8 iyun 2011 16:01
İşə başlamamış istefa
Türkiyə Superliqasında yeni mövsüm hələ start götürməsə də, artıq ilk baş məşqçi istefası gerçəkləşib. Azerisport.az xəbər verir ki, elə qarşıdakı mövsüm ərəfəsində “Gençlerbirliği”nin sükanı arxasına gətirilən Giray Bulak heç əməli fəaliyyətə başlamamış klubla yollarını ayırmağa qərar verib.
Qeyd edək ki, Giray Bulak paytaxt klubunun sükanı arxasına cəmi iki həftə öncə gətirilmişdi və tərəflər yeni mövsümə hazırlaşırdılar. Lakin qardaş ölkə mətbuatının iddiasına görə, transfer məsələlərində klub rəhbərliyi ilə baş məşqçi arasındakı fikir ayrılıqları onların işbirliyinin qısa alınmasına gətirib çıxarıb. Nəticədə tərəflər qarşılıqlı razılıq əsasında müqaviləni ləğv ediblər.
Beləce, Superliqada hələ mövsüm başlamasa da, ilk məşqçi istefası gerçəkləşmiş olub. İndi “Gençlerbirliği” özünə yeni baş məşqçi, Giray Bulak isə iş yeri axtarır.
Onu da xatırladaq ki, son mövsüm başa çatan kimi almaniyalı baş məşqçi Ralf Zumdikin istefa verməsi “Gençlerbirliği”ni Bulak ilə 1 illik müqavilə bağlamaq məcburiyyətində qoymuşdu.
