9 iyun 2011 16:34
TFF-dən Chelsea`yə Hiddink təhdidi
İngiltərənin “Chelsea” klubu Türkiyə yığmasının baş məşqçisi Qus Hiddinkə olan marağını gündən-günə artırdıqca qardaş ölkənin futbol federasiyası da susqunluğunu pozub. Azerisport.az xəbər verir ki, TFF də ingilisləri FIFA-ya şikayət etməklə təhdid edib.
Qeyd edək ki, “Chelsea” tərəfi Hiddinki sükanı arxasına aparmaqda nə qədər maraqlıdısa, hollandiyalı da Londona qayıtmaqda bir o qədər həvəslidi. Lakin Türkiyə futbol təsərrüfatının rəhbərliyi onun tsiklin ortasında rahatca komandanı atıb, İngiltərəyə getməsinə heç də isti baxılmır.
Məhz bu üzdən son günlərə kimi “ay-ulduzlular”ın rəhbərliyi Hiddink üçün fantastik qiymətlər oxumaqla qarşı tərəfi həvəsdən salacaqlarını düşünürdülər. Amma bunun da bəhrəsiz qaldığını görən federasiya nəhayət, təhdidə əl atıb. Türklər Hiddink gedəcəyi halda həm onu, həm də “Chelsea”ni FİFA-ya şikayət edəcəklərini iddia edirlər.
Qeyd edək ki, 64 yaşlı mütəxəssis vaxtilə “Chelsea”də çalışıb. Lakin onun hazırda TFF ilə uzunmüddətli müqaviləsi var. Türkiyənin AÇ-2012-nin seçmə mərhələsində millimizə rəqib olduğunu da vurğulayaq.
