11 iyun 2011 20:01
Hiddink seçmə mərhələdəki əsas rəqibinin adını açıqladı
AÇ-2012-nin seçmə mərhələsində millimizin rəqiblərindən olan Türkiyə milli komandasının baş məşqçisi Qus Hiddink son günlər özü barədə yazılanlara reaksiya verib. Azerisport.az xəbər verir ki,
hollandiyalı mütəxəssis “De Telegraaf”da qələmə aldığı köşə yazısında heç bir klubla görüşmədiyini bəyan edib:
“Son günlər haqqımda çox şeylər yazılıb-cızılıb. Mən bunların heç birinə cavab vermək istəmirəm. Yalnız bunu söyləmək istəyirəm: Həftələrdir heç bir klubla hər hansı görüşüm olmayıb” yazan Hiddink İngiltərənin “Chelsea” klubunun sükanı arxasına keçəcəyi barədə iddialara hələlik son nöqtə qoyub.
Seçmə qrup mərhələsində cəmi 4 oyunlarının qaldığını xatırladan Hiddink 2-ci pillə uğrunda mübarizədə Türkiyəyə Belçikanı əsas rəqib görür: “Qazaxıstan, Almaniya və Azərbaycanla evdə oynayacağıq. Yalnız Avstriya ilə səfərdə qarşılaşacağıq. Belə görünür ki, qrup ikinciliyi üçün yeganə rəqibimiz Belçika olacaq. Onlar çox yaxşı komanda qurublar. Amma Belçikaya yenilməməyimiz bizi qrup ikinciliyi baxımından daha şanslı duruma gətirdi. Qalan matçlarda biz də bunu göstərməliyik. Hər hansı şanssızlıq olmasa, Türkiyə qrup ikincisi kimi mübarizəni davam etdirəcək”.
