13 iyun 2011 16:14
Simurq`un prezidenti dəyişdirildi
“Simurq”un prezidenti Zaur Məmmədov istefaya göndərilib. Azerisport.az xəbər verir ki, onu bu postda vaxtilə bank aləmində birgə çalışdıqları Anar Bəkirov əvəz edəcək.
“2006-cı ildən Azərbaycan futbolundayam və düzünü deyim ki, yorulmuşam. Buna görə də getməyə qərar verdim. Hazırda bütün işləri Anar Bəkirova verirəm. Ona bu işdə uğurlar arzulayıram” – deyə Zaur Məmmədov saytımıza açıqlamasında qeyd edib.
Qeyd edək ki, Zaur Məmmədov Zaqatala klubunun ilk prezidenti olub. Klub onun rəhbərliyi altında birinci divizionda mübarizə aparsa da, tezliklə Premyer Liqaya yüksəlib. 2008/09 mövsümündə komanda çempionatı üçüncü pillədə başa vurmaqla ən böyük uğuruna imza atdı. Bürünc medalçı kimi hətta avrokuboklarda da çıxış edən Zaqatala klubu elə ilk cəhdindəcə uduzdu. Son mövsümdə isə komanda 13-cü yeri tutduğu üçün elitanı tərk etdi və birinci diviziona qayıtdı.
