14 iyun 2011 00:01
Qarabağ tam tərkiblə məşqlərə başladı
Ölkəmizi Avropa Liqasında təmsil edəcək “Qarabağ” Türkiyədə təlim-məşq toplanışını davam etdirir. Azerisport.az xəbər verir ki, 4 gündü 12 nəfərlə məşq edən komandaya dünən axşam legionerlər də qoşulub.
Ötən gün isə Azərbaycan millisinin üzvləri və Adamiya komandamızın düşərgəsinə qatılaraq ümumilikdə futbolçuların sayını 22-yə çatdırıblar. Amma komanda heç də tam heyətlə məşq edə bilməyib.
Belə ki, günün ilk çalışması 10:15-də baş tutanda millinin futbolçuları hələ yoldaydılar. Məşq isə trenajor zalında başladı. Yarım saatlıq çalışmanın ardından komanda meydançaya yollanın. Təxminən 80 dəqiqə davam edən çalışmada futbolçular əsasən sürət çalışmalarını yerinə yetiriblər.
Günün ikinci məşqi isə 17:30-da baş tutub. Artıq tam heyətlə toplaşan komandanın məşqindən öncə baş məşqçi Qurban Qurbanov çıxış edib. Ardınca baş tutan məşqdə milli üzvləri ancaq “kvadrat”la kifayətləniblər. Zədəli Rauf Əliyev isə çalışmada iştirak etməyib.
Məşqin sonunda isə tək toxunuşlu, ardınca isə sərbəst olaraq futbol oynanılıb. Təcrübəli Zaur Həşimovun başçılıq etdiyi Osman Umarov, Qara Qarayev, Tural İsgəndərov, Murad Səttarlı, Elgiz Kərəmi və Kamil Hüseynovdan ibarət komanda Bojan Pavloviç, Ansi Aqolli, Namiq Yusifov, Emin İmaməliyev, Admir Teli, Nderim Nedzipi və İlqar Qurbanovdan ibarət komandanı ümumi nəticədə 1 top fərqiylə məğlub edinlər. Bu günə də ağdamlıların iki məşqi nəzərdə tutulub.
