17 iyun 2011 14:48
Stiv Olfers Qəbələ`dən həm şikayət, həm də tərif etdi
“Qəbələ”nin hollandiyalı müdafiəçisi Stiv Olfers ölkəsindən olan jurnalistlərə bir sıra maraqlı açıqlamalar verib. Azerisport.az xəbər verir ki, vaxtilə “Feyenoord” və PSV kimi klubların şərəfini qorumuş futbolçu son mövsümdəki nəticələrindən, yeni mövsüm üçün hədəflərindən və komandasının baş məşqçisi Toni Adamsdan danışıb.
“Ötən mövsüm məni çox məyus etdi. Biz sadəcə 7-ci yeri tuta bildik. Artıq mövsümün ortasında həm medallar, həm də avrokuboklara getmək şansımızı tam itirmiş olduq” – deyə, Olfers təəssüfünü gizlətməyib.
29 yaşlı holland bu nəticənin onu qətiyyən qane etmədiyini bildirib: “Mən autsayderlərlə mübarizə aparan ikinci altılıq komandasında oynamaq istəmirəm. Amma hələ mövsümün əvvəlindən demişdilər ki, bu il bizim üçün hələ başlanğıc mərhələsidi. Növbəti mövsümdən isə artıq çempionluq üçün mübarizə aparacağıq”.
Olfers baş məşqçi Toni Adamsın işinin çətinliyindən də danışıb: “Onun əlinin altında elə də çox futbolçu yoxdu. Adams isə məhz onlarla uğur qazanmalıdı. Fikrimcə, növbəti mövsüm çox şeyə aydınlıq gətirmiş olacaq”.
Lakin bütün bu şikayətlərinə rəğmən, Stiv “Qəbələ”dən ayrılmaq fikrində deyil: “Mən hələ uzun müddət bu komandada qalmaq istərdim. Çünki, bu, mənim karyeramda xüsusi önəm daşıyır. Burda yaxşı məvacib verirlər, bu cəhətdən çox yaxşıdı. Növbəti mövsümdə də əsas məqsədimiz Avropa Liqasına və ya Çempionlar Liqasına vəsiqə qazanmaq olacaq”.
(Voetbal International)
