18 iyun 2011 01:26
Sadıqovun komanda yoldaşı Fenerbahçe'də
Uzun müddət idi ki, “Beşiktaş” və “Fenerbahçe” kimi böyük klublara transfer olunması gözlənilən “Eskişehirspor”un gənc oyunçusu Sezer Öztürkün yeni komandasının adı nəhayət ki, dəqiqləşib. Azerisport.az xəbər verir ki, klub rəhbərlikləri səviyyəsində aparılan danışıqlar nəticəsində eskişehirlilər futbolçunu sonda “sarı-lacivərd”lilərə satıblar.
Öztürklə “Fenerbahçe” arasında 4 illik sözləşmə imzalanıb. “Fenerbahçe” isə transfer qarşılığında ötən mövsüm “İstanbul Büyükşehir Belediyespor”da icarə əsasında forma geyən oyunçusu Abdülkadir Kayalı ilə braziliyalı müdafiəçisi Fabio Bilicanı “Eskişehirspor”a verib. Üstəlik, İstanbul klubu Öztürkə görə 2 milyon 750 min avro da ödəməlidi.
Qeyd edək ki, 26 yaşlı oyunçu futbola Almaniyada başlayıb. İlk peşəkar klubu “Bayer” olan Sezer 2005-ci ildə “Germinal”a icarəyə verilib. Daha sonra “Nürnberg”ə transfer olunub. 2006-cı ildə isə Türkiyəyə - “Vestel Manisaspor”a transfer olub. Ege klubunda 76 matçda forma geyən Sezer Öztürk, bu görüşlərdə 15 qol vurmağı bacarıb. 2009-cu ildən “Eskişehirspor”da çıxış edirdi. Ötən mövsüm bu komandada oynadığı 29 matçda 8 qol vurub. Millimizin kapitanı Rəşad Sadıqovla komanda yoldaşı olub.
