19 iyun 2011 14:55
La Liqaya son vəsiqənin sahibi müəyyənləşdi
İspaniya La Liqasının növbəti mövsümündə çıxış etmək şansı qazanan son klubun adı müəyyənləşib. Azerisport.az xəbər verir ki, bu xoşbəxt komanda “Granada” olub.
İspaniyanın Segunda Divizionunda mübarizə aparan bu komanda “Elche” ilə pley-off matçında bu hüquqa yiyələnib. Cəmi 3 gün öncə keçirilən ilk görüşdə tərəflər qolsuz bərabərliyə razılaşmışdılar. “Elche”nin meydanında keçirilən cavab görüşündə də heç-heçə qeydə alınıb - 1:1. Amma məhz səfər qolunu vurması “Granada”nı 35 illik fasilədən sonra La Liqaya daşıyıb.
Maraq üçün xatırladaq ki, bu komanda sonuncu dəfə 1975-1976 mövsümündə güclülər dəstəsində mübarizə aparmışdı. “Granada”dan öncə La Liqaya yüksələn ilk iki komandanın “Real” (Betis) və “Rayo Vallecano” olduğunu da qeyd edək.
