20 iyun 2011 01:11
Rusiya futbolunda şok olay!
Rusiya Premyer Liqasında futbol meydanlarında heç də asanlıqla rast gəlinməyəcək bir olay yaşanıb. Azerisport.az xəbər verir ki, “Zenit”in formasını geyən serbiyalı hücumçu Danko Lazoviç stadionda polis zorakılığına məruz qalıb.
Sankt-Peterburq təmsilçisinin forvardı “Volqa” (Nijni Novqorod) ilə səfər matçından sonra qazandıqları 2:0 hesablı qələbəni azarkeşləri ilə bayram etmək üçün onlar oturan sektora yaxınlaşıb. Lakin qələbə sevincini tərəfdarları ilə paylaşmaq üçün formasını onlara vermək istədiyi bir vaxtda polis tərəfindən elektrik şoku aləti ilə hücuma məruz qalıb.
Bu nadir və çirkin olay “Zenit” rəhbərliyini də özündən çıxarıb. Klubun rəsmi saytında olaya sərt etiraz bildirilib. Lazoviç özü də olayla bağlı fikirlərini bildirib: “Qarşılaşmanın ardından formamı tərəfdarlara vermək üçün onların yanına getdiyim zaman arxamda bir polis peyda oldu və elektrik şoku ilə məni arxadan vurdu. Bu olayın niyə baş verdiyini bilmirəm. Bəlkə də mənim bir tərəfdar olduğumu zənn etdi”.
Klub rəhbərliyi polisin və Futbol Federasiyasının bu özbaşınalığa görə cavab verməsini tələb etsə də, qarşı tərəf bu iddiaları qəbul etmir.
