20 iyun 2011 15:34
Millimiz Makedoniya ilə Dalğada qarşılaşacaq
Azərbaycan və Makedoniya futbol yığmaları arasındakı qarşılaşma Mərdəkanda keçiriləcək. Azerisport.az xəbər verir ki, xeyli müddət idi ki, sözügedən matçın Mərdəkandakı “Dalğa” stadionunda oynanılması varıantına baxılırdı.
Artıq bu görüşün məhz həmin arenada keçiriləcəyi dəqiqləşib. Qeyd edək ki, bu günlərdə FİFA və UEFA prezidentləri tərəfindən rəsmi açılış mərasimi təşkil olunan arena 6700 tamaşaçı tutumuna malikdi.
Makedoniyalılarla qarşılaşma yoxlama görüşü olduğundan, Tofiq Bəhramov adına Respublika stadionunun tam dolmaması istisna deyildi. Görünür, AFFA rəhbərliyi də məhz bu üzdən görüşün Mərdəkanda oynanılmasına qərar verib. Baxmayaraq ki, qarşılaşmanın Lənkəran şəhər stadionunda da oynanılması mümkün idi.
Azərbaycan – Makedoniya yoldaşlıq matçının avqustun 10-da keçiriləcəyini də qeyd edək. Bu qarşılaşma Azərbaycan millisinin tarixində ev oyununu keçirdiyi növbəti arena kimi yadda qalacaq.
