21 iyun 2011 11:04
UEFA Minsk - AZAL oyununun yerini dəyişdirdi
UEFA Avropa Liqasındakı təmsilçilərimizdən AZAL-ın “Minsk”lə oyunu ilə bağlı dəyişikliyə əl atıb. Azerisport.az xəbər verir ki, paytaxt klubunun Belarus təmsilçisiylə matçlarının keçirilmə yerini dəyişdirib.
Belə ki, püşkə əsasən Nazim Süleymanovun komandası ilk matçını səfərdə keçirməliydi. Lakin qitə futbol qurumunun saytı bu gün ilk oyunun Bakıda keçiriləcəyini göstərib. Hələlik bunun texniki səhv, yaxud UEFA-nın həyata keçirdiyi dəyişiklik olduğunu demək çətindi. Hər halda bu məsələyə tezliklə aydınlıq gələcək.
Sadəcə, onu vurğulayaq ki, UEFA adətən komandalarımızın ev oyunlarının Tofiq Bəhramov adına Respublika stadionunda keçirilməsini nəzərə alaraq, belə qərarlar qəbul edirdi. Bu il isə AZAL-ın öz stadionu olduğundan, “Qarabağ”la oyunları fərqli arenalarda keçirməsi mümkündü. Odu ki, UEFA-nın belə qərarı anlaşılmazdı.
Maraq üçün qeyd edək ki, AZAL-ın “Minsk”lə ilk dueli iyunun 30-da baş tutacaq.
