22 iyun 2011 18:48
Olimpik`in yeni baş məşqçisi müəyyənləşdi
Fransa çempionatının aparıcı klublarından olan Lion “Olympique”i özünə yeni baş məşqçi tapıb. Azerisport.az xəbər verir ki, klub rəhbərliyi elə dünən vəzifəsindən uzaqlaşdırdığı Klod Pyuelə əvəzləyici axtarmaq üçün çox vaxt itirməyib.
Belə ki, son üç ildə uğur üzünə həsrət qalan Lion klubunu bundan sonra Remi Qard çalışdıracaq. Artıq klubun rəsmi saytı da bu məlumatı rəsmən təsdiqləyib və yeni baş məşqçi ictimaiyyətə təqdim olunub.
Qeyd edək ki, Pyuelin yerinə gələn bu gənc mütəxəssis sabiq “Arsenal”lı və “Olympique”li futbolçudu. O, baş məşqçi postuna kimi elə məhz Lion klubunun futbol akademiyasına rəhbərlik edirdi.
Maraq üçün xatırladaq ki, yeddi dəfə ardıcıl Fransa çempionluğunu bayram edən, lakin Pyuelin rəhbərliyi altındakı 3 illik dönəmdə bir dəfə də bu uğuru təkrarlaya bilməyən “Olympique” rəhbərliyi çıxış yolunu məhz baş məşqçi dəyişikliyində gördü. Baxmayaraq ki, fransalı mütəxəssisin müqaviləsinin bitməsinə hələ 1 il qalırdı. Lakin klub rəhbərliyi Pyuellə müqaviləni birtərəfli qaydada pozduğuna görə, 4 milyon avro təzminat ödəməyi də gözə alıb.
