23 iyun 2011 01:52
Ruslar Karlosu təbdən çıxardı, Sadıqov sakitləşdirdi (VİDEO)
Rusiya Premyer Liqasında çıxış edən “Anji”nin braziliyalı ulduzu Roberto Karlos növbəti irqçi təhqirə məruz qalıb. Azerisport.az xəbər verir ki, təcrübəli müdafiəçi Mahaçqala klubunun “Krılya Sovetov”la bu gecəki səfər matçının (3:0) 89-cu dəqiqəsində növbəti dəfə azarkeşlərin onu bananla təhqir etməsinə dözə bilməyib.
Yerli azarkeşlərin bu hərəkətindən sonra Karlos komandasının hər 3 oyunçu dəyişikliyindən istifadə etməsinə rəğmən, meydançanı tərk etməklə olaya sərt reaksiya verib. Onu sakitləşdirənlər arasında isə göründüyü kimi, millimizin sabiq çalışdırıcısı Vaqif Sadıqov da var.
Xatırladaq ki, bu, artıq Karlosa qarşı Rusiya karyerası ərzində ikinci belə “banan təcavüzü”dü. Mövsümün əvvəlində "Zenit" azarkeşləri də ona banan göstərməklə təhqir etmişdilər.
