23 iyun 2011 13:57
Minsk rəsmisi: AZAL-ın ənənəsi olmasa da, ambisiyalıdı
Belarusun “Minsk” klubunun baş direktoru İqor Şloydo ölkəsinin mətbuatına verdiyi müsahibədə komandasının şanslarını dəyərləndirib, onlara rəqib olan Azərbaycan klubu AZAL-dan danışıb.
Öncə ev oyunlarının yerinin dəyişdirilməsi məsələsinə toxunan klub rəsmisi bunları dilə gətirib: “Bizim avrokuboklardakı debüt matçımızın evdə yox, səfərdə keçirilməsi haqda qərarın çıxarılması gözlənilməz oldu. Nyondakı püşkatmadan sonra biz “Olimpik” (AZAL-ı nəzərdə tutur – azerisport.az) nümayəndələri ilə görüşdük. Onlarla bir sıra maraqlı məqamları müzakirə etdik. Həmin görüşdə bir çox problemlərin yoluna qoyulduğunu düşünüb, ayrıldıq. Amma ardından xeyli kuryoz alınan bir vəziyyət yaşandı. Klubumuzun mətbuat xidmətindən zəng ediblər ki, ilk oyun Bakıda keçiriləcək. Bu haqda “Olimpik”in saytında xəbər yerləşdiriblər (qeyd edək ki, burda onlar yanılırlar. Çünki AZAL-ın saytında heç bir belə informasiya yer almayıb – azerisport.az). Cavab verdim ki, UEFA-nın saytı ilə maraqlan, onlar düz yazar. Növbəti yarım saatda artıq biz əmin olduq ki, cavab görüşünü evdə keçirəcəyik”.
“Mən belə başa düşürəm ki, UEFA-nın prinsiplərinə görə eyni şəhərdə iki avrokubok oyununun keçirilməsi mümkünsüzdü. Amma bu haqda bizə heç bir rəsmi xəbər göndərilməməsinə çox təəccübləndim. Biz hər şeyi demək olar ki, təsadüfən öyrəndik. Bu üzdən artıq televiziya ilə danışmışdıq, 30 iyuna hər şeyin təşkil olunmasını xahiş etmişdik. Amma nə etmək olar. İndi hər şeyi dəyişmək lazımdı” – deyə, “Minsk” rəsmisi vurğulayıb.
“Mən belə başa düşürəm ki, UEFA-nın prinsiplərinə görə eyni şəhərdə iki avrokubok oyununun keçirilməsi mümkünsüzdü. Amma bu haqda bizə heç bir rəsmi xəbər göndərilməməsinə çox təəccübləndim. Biz hər şeyi demək olar ki, təsadüfən öyrəndik. Bu üzdən artıq televiziya ilə danışmışdıq, 30 iyuna hər şeyin təşkil olunmasını xahiş etmişdik. Amma nə etmək olar. İndi hər şeyi dəyişmək lazımdı” – deyə, “Minsk” rəsmisi vurğulayıb.
Şloydo həmçinin AZAL barədə də fikirlərini açıqlayıb: “Azərbaycan klubunun nümayəndələri xoş təsir bağışladılar. Nəzakətli və hörmətli adamlara bənzəyirdilər. Sponsorları yerli aviakompaniyadı. Öz stadionları var, yaxınlığında oteli. Aeroporta da yaxındılar. Əsasən legionerlərə üstünlük verirlər. Komandada onların sayı hardasa ona yaxındı. AZAL-ın ənənəsi olmasa da, ambisiyalıdı. Onların “İnter”i qabaqlaması çox şeydən xəbər verir. Amma bu komandanı detallı şəkildə öyrənmək üçün hələ vaxtımız var”.
"Minsk" rəsmisi bildirib ki, AZAL ilə oyunlar ərəfəsində komandanın heyətini gücləndirmək planları yoxdu: "Belə planımız yoxdu. Kim varsa, onlarla nəsə etməyə çalışacağıq. Hesab edirəm ki, futbolçu seçimimiz elə də pis deyil. Bizim yeganə qorxumuz oyun qrafikinin həddən artıq sıx olmasıdı. Bu, həm fiziki cəhətdən yorğunluğa səbəb ola, həm də zədələrə gətirib çıxara bilər. Onsuz da ehtiyat oyunçular skamyamız elə də geniş deyil və bu, bizi çətinə sala bilər. Yeri gəlmişkən, bizim "Olimpik" kimi tanıdığımız bu komanda AZAL-dı. Sadəcə UEFA onların adının sponsorla bağlı olması səbəbindən əvvəlki adını qeyd edir".
