23 iyun 2011 14:55
Bakı Verpakovskiyə 2 illik müqavilə təklif etdi
Yunanıstanın "Erqotelis" klubunun latviyalı hücumçusu Maris Verpakovskis karyerasını ölkəmizdə davam etdirə bilər. Azerisport.az xəbər verir ki, “Bakı”nın baş məşqçisi Aleksandr Starkov ölkəsinin ən tanınmış futbolçularından olan Verpakovskini komandasında görmək istəyir.
Qeyd edək ki, 31 yaşlı hücumçu 1995-1996 mövsümlərində Latviyanın "Baltika", 1996-2000-də "Metalurq" və 2000-2003-də "Skonto" klublarında çıxış edib. 2003-cü ildə Kiyev "Dinamo"suna transfer olunan forvard, 2007-ci ildə İspaniya "Xetafe"sində, 2007-2008-də Xorvatiya "Hayduk"unda, 2008-də İspaniya "Selta"sında da top qovub. 2009-cu ildən isə Yunanıstanda çıxış edir.
1999-cu ildən bəri 86 dəfə Latviya millisinin formasını geyinən forvard 28 qola imza atıb. Verpakovski 2 dəfə Latviya çempionluğunu (2001, 2002), 2 dəfə Latviya Kubokunu (2001, 2002), 1 dəfə Ukrayna çempionluğunu (2004), 2 dəfə Ukrayna Kubokunu (2005, 2006) qazanıb. 2001-ci ildə Latviya millisi ilə "Baltika Kuboku"nun qalibi olub.
Müqavilə ilə Kiyev "Dinamo"suna məxsus olan latviyalı ukraynalılara lazım olmadığından, "Bakı"ya transferi və icarəyə verilməsi mümkündü. Məhz bu üzdən paytaxt klubu artıq bu futbolçuya rəsmi təklif ünvanlayıb. “Zolaqlılar” Verpakovski ilə iki illik müqavilə bağlamaqda maraqlı olsa da, o, bir illik anlaşmaya razıdı. Hazırda tərəflər danışıqları davam etdirirlər.
Qeyd edək ki, Verpakovskini 2009-cu ildə "İnter" də heyətinə qatmaq istəyirdi. Həmçinin Starkov yeni gələndə də bu futbolçunun “Bakı”ya keçidi gündəmdə idi.
