23 iyun 2011 11:33
Ernad Skuliç: Neftçi Dinamo ilə oyunda müdafiədə oturmamalıdı
“Bakı”nın xorvatiyalı yarımmüdafiəçisi Ernad Skuliç azerisport.az saytına müsahibəsində ölkəsini təmsil edən Zaqreb “Dinamo”su ilə Azərbaycan çempionu “Neftçi”nin Çempionlar Liqasındakı qarşıdurmasından danışıb.
O, öncə özlərinin avrokuboklardan kənarda qalmalarına təəssüfünü dilə gətirib: “Bəli, avrokuboklarsız qalmaq dözülməzdi. Sanki nəsə çatışmır. Amma digər tərəfdən də istirahət üçün böyük vaxt qazandıq. Eyni zamanda baş verənləri analiz etmək üçün. Nəticə çıxarmalı və növbəti mövsümə daha yaxşı hazırlaşmalıyıq”.
Xorvatiyalı futbolçu “Neftçi”nin onun həmyerliləri ilə dueldəki şanslarını belə dəyərləndirib: “Əgər “Neftçi” Zaqrebdə qol vurub buraxmasa, işin yarısını görmüş olacaq. Sərfəli nəticə kimi qollu heç-heçəni də münasib hesab edirəm. Amma məğlubiyyət vəziyyəti çətinləşdirəcək. Hətta səfər qoluna imza atsalar da belə. Əminəm ki, “Neftçi” Zaqrebdəki oyunda daha çox müdafiəyə diqqət ayıracaq və işi xeyli çətin olacaq”.
Amma Skuliç həmyerliləri üçün də çətin olacağını gizlətmir: “Püşkatmadan sonra mənə xorvatiyalı jurnalistlər zəng edirdilər, “Neftçi” haqda soruşurdular . Mən deyirdim ki, “Neftçi” Azərbaycan çempionudu və bu, hər şeyi deyir. Burda Premyer Liqanın səviyyəsi ildən-ilə yüksəlir”.
Xorvatiyalı futbolçu qeyd edir ki, “Dinamo” da qarşısına yüksək hədəflər qoyduğundan tərəfləri güzəştsiz mübarizə gözləyir: “Dinamo”nun qarşısına qrup mərhələsinə vəsiqə qazanmaq vəzifəsi qoyulub. Əgər onlar bunu bacarmasalar, bu, əsl faciə olacaq. Onlar demək olar ki, hər il bunun üçün mübarizə aparırlar. Bu baxımdan təcrübələri də “Neftçi”dən çoxdu. Amma Azərbaycan çempionu da rəqibini təəccübləndirə bilər”.
31 yaşlı yarımmüdafiəçi “Dinamo”nun futbolçularını da dəyərləndirib: “Onların həm çoxlu gənc oyunçusu, həm də təcrübəliləri var. Məsələn, braziliyalı Sammir, müdafiəçi Kufre, yarımmüdafiəçi Bades aparıcı oyunçulardandı. Yaxınlarda Lekonu heyətlərinə qatdılar. Heç hücum xəttindən danışmıram. Yeri gəlmişkən, “Dinamo” sırf hücum futboluna üstünlük verir və daim rəqib müdafiəsini təzyiqdə saxlamağa çalışır”.
Skuliç “Neftçi”yə məsləhət də verməyi unutmayıb: “Neftçi” gərək öz qapısına sığınıb, müdafiə olunmasın. Əgər “Dinamo” topa nəzarət edən tərəf olsa, o zaman “Neftçi” üçün çox çətin olacaq. Top saxlamaq, hücumlar təşkil etmək lazımdı. Göstərmək lazımdı ki, Zaqrebə də qələbə dalınca gedib, uduzmağa yox. Düşünmürəm ki, “Neftçi”ni lazımınca qiymətləndirməsinlər. Bizdə də gözəl bilirlər ki, Azərbaycan futbolu necə sürətlə inkişaf edir. Hamı “Qarabağ”ın son iki ildəki uğurlarından xəbərdardı”.
