24 iyun 2011 01:05
Real`a transferi Hamit Altıntopa düşmədi
AÇ-2012-nin seçmə mərhələsində Azərbaycan millisinin rəqibi olan Türkiyə yığmasının və İspaniyanın “Real” klubunun futbolçusu Hamit Altıntop əməliyyat olunacaq. Azerisport.az xəbər verir ki, hələ Münhen “Bayern”ində olduğu dövrdə zədədən əziyyət çəkən hücumçu Madrid klubunun həkimlərinin rəyinə görə əməliyyata məruz qalacaq və ən azı iki ay yaşıl meydanlardan kənar qalacaq.
Qeyd edək ki, Altıntop “Real”la elə ötən ay 4 illik rəsmi müqavilə imzalamışdı. Lakin onun üçün bu yeni xəbər heç də ürəkaçan olmayıb. Müalicə ilə vəziyyətinin düzələcəyinə ümid bəsləyən futbolçu yeni komandasındakı ilk günlərindən uğursuzluqla üzləşib. Artıq gələn həftə onun əməliyyat masasına uzanacağı dəqiqləşib. 28 yaşlı futbolçu iyunun 27-də Almaniyada əməliyyat olunacaq.
Belədə “Real”ın yeni mövsüm üçün təlim-məşq toplanışında iştirak etməyəcək Hamit Altıntopun La Liqanın startındakı bir neçə oyunu da buraxacağı dəqiqdi.
