24 iyun 2011 11:52
İnter Almaniyada ikinci oldu
Xəbər verdiyimiz kimi, "İnter"in 10 yaşlı futbolçulardan ibarət komandası beynəlxalq səviyyəli turnirlərdə iştirak etmək məqsədilə Almaniyadadı. Azerisport.az xəbər veir ki, bu gün komandamız Almaniyanın “TV Elverdissen E1910” Futbol Klubunun stadionunda keçirilən “Internationaler U-11-Cup” turnirində iştirak edib.
4 komandanın mübarizə apardığı "D" qrupunda "İnter" “TV Elverdissen EIII” komandasına 1:0 hesabıyla qalib gəlib. Oyunda yeganə qolun müəllifi Təbriz İsazadə olub. Almaniyanın digər təmsilçisi “SG Unvertürkheim” komandası da "İnter"lə bacarmayıb. Futbolçularımız almanlar üzərində 2:1 hesabıyla inamlı qələbə qazanıblar. Qolları Təbriz İsazadə və Seyhan Fərəcov vurub. Almaniyanın digər təmsilçisi “TUS Ahmsen” də komandamızın gücünü hiss edib və oyun 1:0 hesabıyla komandamızın xeyrinə başa çatıb. Bu dəfə Eltac Məmmədov fərqlənib. Beləliklə, "İnter" 9 xalla qrupun lideri olub və 2-ci qrupa vəsiqə qazanıb.
Bu qrupda da komandamız qələbələri ard-arda sıralayıb. “ASV Dachau” komandasını 2 dəfə mərkəzdən başlamağa vadar edən "İnter" (qolları Təbriz İsazadə vurub) yalnız “TUS Hunnebrock” komandasına 0:1 hesabıyla yenilib. Yarımfinala vəsiqə qazanmaq üçün komanda “SV Vaihingen”ə qalib gəlməliydi. Gərgin mübarizə və qarşılıqlı hücum şəraitində keçən oyun 0:0 hesablı bərabərliklə başa çatıb. Qalib 11 metrlik cərimə zərbələri nəticəsində müəyyənləşib. Komandamız əzmkarlıq nümayiş etdirərək 5:3 hesablı qələbə qazanıb və yarımfinala vəsiqə qazanıb. Təbriz İsazadə, Seyhan Fərəcov, Ceyhun Nuriyev, Tamerlan Abdullayev, Murad Bağırov penaltiləri dəqiq yerinə yetiriblər. Yalnız Əliseyran Eyvazovun zərbəsi qapı dirəyinə dəyərək rəqibi ümidləndirib.
Yarımfinalda "İnter" İngiltərənin “Luton Town” komandasıyla qarşılaşıb. Bu qarşılaşmanın əsas vaxtı da 0:0 hesabıyla başa çatdığından qalib 11 metrlik cərimə zərbələrinin yerinə yetirilməsilə müəyyənləşdirilib. "İnter" bu dəfə də qalibiyyəti əldən verməyib. Komandamız ingilislər üzərində 3:1 hesabıyla qələbə qazanaraq final mərhələsinə vəsiqəni əldə edib. Bu dəfə də Təbriz İsazadə, Seyhan Fərəcov, Ceyhun Nuriyev və Tamerlan Abdullayev dəqiq zərbə endiriblər.
Final mərhələsində "İnter" növbəti dəfə Almaniyanın “SV Vaihingen” komandasıyla üz-üzə gəlib. Lakin bir necə əlverişli vəziyyətdən yararlana bilməyən futbolçularımız 0:2 hesabıyla rəqibə məğlub olaraq turniri ikinci yerdə başa vurublar. Xüsusi olaraq qeyd etmək lazımdır ki, "İnter"in qarşılaşdığı rəqib komandaların üzvləri 1 yaş böyük idilər.
Qeyd edək ki, “İnter” Almaniyada keçirilən digər beynəlxalq səviyyəli yarışda - “SV RW-Bentfeld Cup” turnirində iştirak edəcək.
