26 iyun 2011 01:26
XL-ın ilk sınaq matçına sözardı (FOTOLAR)
Avstriyanın Fulpmes şəhərciyində hazırlığını davam etdirən “Xəzər Lənkəran”ın Almaniyanın 2-ci Bundesliqa təmsilçisi “Dinamo” (Drezden) komandası ilə yoxlama oyunu keçirdiyini xəbər vermişdik. Azerisport.az xəbər verir ki, rəqibiylə qolsuz heç-heçəyə razılaşan Mirça Rednikin komandası Neustift şəhərciyində yerləşən meydanda keçirilən oyuna aşağıdakı start heyətlə çıxıb:
Kamal Bayramov, Elnur Allahverdiyev (k), Manuel Skarlatake, Elvin Beqiri, Rahid Əmirquliyev, Elnur Abdullayev, Katalin Doman, Dieqo Souza, Andrey Mureşan, Onofranş və baxışda olan futbolçu (klubla müqavilə bağlanmadığından adı açıqlanmasa da, böyük ehtimalla bu, portuqaliyalı Joao Pintodu – azerisport.az).
İlk dəqiqələrdən topa sahib olan “Xəzər Lənkəran” ilk 15 dəqiqə ərzində ərazi üstünlüyünü də ələ keçirərək tək toxunuşlu ötürmələrlə rəqibindən üstün oyun sərgilydib. 15-ci dəqiqədə baxışda olan futbolçunun qüvvətli zərbəsini rəqib qapıçı çətinliklə kornerə çıxarıb. Futbolçularımızın bir-biri ilə yaxşı anlaşması sayəsində Bundesliqa təmsilçisi demək olar ki, bir dəfə də olsun XL-ın qapısı önündə real qol vəziyyəti yarada bilməyib. İlk hissənin sonuna 5 dəqiqə qalmış bu dəfə Katalin Doman qola yaxın olub. Lakin “Dinamo”nun qolkiperi yenə də yaxşı oynayaraq qola imkan verməyib.
İkinci hissə də rəqib komandanın heyətində olan çoxsaylı dəyişiklər qarşısında baş məşqçi Şəhriyar Xəlilov, Orxan Sadıqlı, Alim Qurbanov, Tosin Dosunmu dəyişikliklərinə əl atıb. Rəqibin önündə sona qədər kombinasiyalı və sabit oyun sərgiləyən “Xəzər Lənkəran” matçın sonuna qədər qapısını toxunulmaz saxlamaqla yanaşı cinahlardan qurulan hücumlarla da “Dinamo”nu daim təzyiqdə saxlayıb. Lakin avstriyalı referinin final fiti matçın qolsuz bərabərliklə başa çatdığını bildirib.
Sonda onu da qeyd edək ki, bu görüşü Avropa Liqasındakı təmsilçimizin ikinci təsnifat mərhələsindəki rəqibi İsrailin “Maccabi” klubunun “casus”ları da izləyib.
