26 iyun 2011 01:44
AZAL-ın rəqibindən əzmkar heç-heçə
Belarus çempionatında növbəti – 15-ci turun oyunları baş tutub. Azerisport.az xəbər verir ki, Avropa Liqasının birinci təsnifat mərhələsində Azərbaycan təmsilçisi AZAL-a rəqib olan “Minsk” hesabat turunu 1 xalla başa vurub.
Paytaxt klubu səfərdə əsas rəqiblərindən “Torpedo”nun qonağı olub. Medallar uğrunda mübarizə aparan Jodino klubu matça daha fəal başlayıb və ilk hissədə qonaqların qapısına iki qol vurub. Lakin “təyyarəçilər”in rəqibi fasilədən sonra isə əzmkarlıq göstərərək məğlubiyyətdən qaçıb. Öncə 57-ci dəqiqədə İqor Voronkov hesab arasındakı fərqi azaldıb. Matçın 67-ci dəqiqəsində isə Anton Ryabtsev avtoqola imza ataraq komandasını qələbədən edib – 2:2
Qeyd edək ki, bu nəticədən sonra “Torpedo” 20 xalla 5-ci pillədə qərarlaşıbsa, “Minsk” geriləyərək 18 xalla 8-ci yerə düşüb.
AZAL ilə "Minsk" arasındakı ilk matçın iyunun 30-da Bakıda keçiriləcəyini də vurğulayaq.
