26 iyun 2011 16:08
Qarabağ toplanışı bitirdi, sabah Litvaya yola düşür
UEFA Avropa Liqasındakı təmsilçilərimizdən “Qarabağ” artıq Türkiyədəki təlim-məşq toplanışını başa vurub. Azerisport.az xəbər verir ki, iyunun 9-dan Qızılcahamda toplanışda olan komanda bu gün 18 gün hazırlıq prosesini bitirib.
Bu gün sonuncu çalışmayla Türkiyə hazırlıqlarını başa vuran Qurban Qurbanovun komandası sabah Litvaya yola düşəcək. “Qarabağ” günorta saatlarında Ankara – İstanbul – Riqa reysiylə yola düşəcək. 20 futbolçulu heyət Latviyanın paytaxtından Litvanın Klaypeda şəhərinə hərəkət edəcək. Oyunun keçiriləcəyi Qarqjdaydan 25 km aralıda yerləşən “Amberton” otelində məskunlaşacaq komandamız oyun gününə kimi 2 dəfə məşqə çıxacaq.
İyunun 30-da yerli vaxtla 18:30-da (Bakı vaxtıyla 20:30) “Banga”nın qonağı olacaq komandamız ertəsi gün vətənə qayıdacaq. Vilnus – İstanbul – Bakı reysiylə Bakıya qayıdacaq komandamız iyulun 2-də səhər saatlarında paytaxtda olacaq.
Sonda onu da bildirək ki, son məşqdə ağdamlıların orta sahə oyunçularından Rəşad Sadiqov kiçik zədə alıb və mümkündü ki, iyunun 30-da keçiriləcək oyunda iştirak etməsin.
