27 iyun 2011 00:37
“Qarabağ`ın oyunçusundan tutmuş, işçisinə kimi hər birini tanıyırıq”
Məlum olduğu kimi, "Qarabağ" son illər bir qayda olaraq yayda Türkiyənin Qızılcahamam bölgəsində, "Soyuq Su" qoruğunda yerləşən "Patalya" otelində təlim-məşq toplanışı keçir. Azerisport.az xəbər verir ki, "Qarabağ"la doğmalaşan otel kollektivinin komandaya qarşı olan sevgi və hörmətlərinin təzahürü olaraq xatirə parkı salınmasına qərar verilib. Otelin müdiri Okan Akçanın şəxsi təşəbbüsü oteldə keçirilən son gündə parkın salınması ilə başa çatıb.
Bəs görəsən, parkın salınmasına Okan bəyi nə vadar edib? Ümumiyyətlə, futbol onun üçün nədi və hansı kluba azarkeşlik edir? Aldığımız cavablar olduqca maraqlı idi. İndi isə baş verənləri Okan bəyin öz dilindən dinləyin: "Açığı, futbol mənim üçün ilk növbədə işdi. Çünki, yayda müştərilərimizın hamısı futbol klubları olur. "Qarabağ" oteli tərk etdikdən sonra 7 klub təlim-məşq toplanışı üçün otelimizdə məskunlaşacaq. Amma "Qarabağ" bizim üçün tam başqa dünyadı. "Qarabağ"ın futbolçusundan tutmuş, işçisinə kimi hər birini tanıyırıq. Tam səmimiyyətlə deyirəm ki, "Qarabağ" bizim üçün müştəri deyil. Artıq o qədər doğmalaşmışıq ki, "Qarabağ"ı öz komandamız bilirəm. Xatirə parkı ideyası isə mənim fikrim idi. Fikirləşdim ki, "Qarabağ"a nə hədiyyə edə bilərik? Hər hansısa maddi hədiyyənin anlamı olmayacaqdı. Biz də belə bir deyim var: "Hər insanın bu həyatda əkdiyi bir ağac olmalıdı". Ona görə də "Qarabağ"ın xatirəsini əbədiləşdirmək üçün xatirə parkı salmaq istədik. Hətta illər keçsə, biz burda olmasaq da, o parka görə hər kəs "Qarabağ"ı xatırlayacaq.
Özüm belə futbol azarkeşi deyiləm. İnanmayacaqsınız, amma Türkiyədə azarkeşlik etdiyim heç bir komanda yoxdu. Sadəcə "Qarabağ"a azarkeşlik edirəm. O da bir ailə olduğumuz üçün. Hətta, Azərbaycanla Türkiyə oynayanda Rəşad qol vuranda "qol" deyə qışqırdım. Rəşadın "Qarabağ"ın futbolçu olması məni belə sevindirmişdi. "Qarabağ"ın bütün fəaliyyətini izləyirəm. Bilirəmki, son 2 ildə çempionatı 3-cü sırada bitirib. Artıq bu il komandanın daha da irəliləməsini istəyirəm. Avrokuboklar isə bir başqa aləmdi. "Qarabağ"ın oyunlarını televiziya vasitəsiylə izləmişəm. Əldə etdiyi uğurlara biz bir başqa sevinmişik. Axı, "Qarabağ" hər il Avrokuboklara bizim yanımızda hazırlaşıb gedir. Necə deyərlər, atalar 3-dən deyib. Bu il "Qarabağ"dan həm çempionatda, həm də avrokubokda daha yüksək nəticələr gözləyirəm və komandama hər 2 yolda uğurlar arzulayıram".
