28 iyun 2011 02:00
Uinston Parks: Bunun üçün əlimdən gələni edəcəyəm
Xəbər verdiyimiz kimi, "Bakı" yerli futbolçular Elvin Məmmədov, Elvin Əliyev və Novruz Məmmədovun ardınca Uinston Parksla 2 illik müqavilə imzaladı. Azerisport.az xəbər verir ki, “zolaqlılar”ın yeni transferi, Kosta-Rika milli komandasının üzvü, “Xəzər Lənkəran”ın sabiq oyunçusu “Bakı”ya keçidi və yeni mövsümdə qarşıda duran vəzifələrlə bağlı fikirlərini açıqlayıb:
“Bakı” yaxşı təşkil olunmuş klubdu. İlk dəfə bura gələndə futbol oynamaq üçün ideal şərait yaradıldığının şahidi oldum. Görünür ki, burada futbolçulara qayğı göstərilir və xüsusi diqqət yetirilir. Yaradılmış şəraiti görən hər bir futbolçu üçün “Bakı”da oynamaq əlavə zövq mənbəyidi.
Kluba yeni gəlmiş bir futbolçu kimi mənim də müəyyən çətinliklərim var. Hər məşqdən sonra komandama daha çox öyrəşməyə başlayıram. İnanıram ki, tez bir zamanda uyğunlaşma dövrünü bitirib, qarşıdan gələn mövsümdə yeni komandamla uğurlara imza atacağam.
İlkin vəzifə olaraq gələn mövsüm “Bakı” ilə kubok və çempionluğu qazanmaq istəyirəm. Bura gəlmişəmsə, kluba xeyr verməliyəm. Bunun üçün əlimdən gələni edəcəyəm. Əsas məqsəd kuboku və çempion titulunu qazanmaqdı”.
