28 iyun 2011 14:42
Xaçaturyanın Bakıya gəlməyəcəyi dəqiqləşdi
AZAL-ın Avropa Liqasının birinci təsnifat mərhələsindəki rəqibi "Minsk" itki ilə üzləşib. Azerisport.az xəbər verir ki, Belarus təmsilçisinin erməni əsilli futbolçusu Andrey Xaçaturyan komandamızla ilk oyunu buraxmalı olacaq.
Məsələ burasındadı ki, o, Belarus çempionatının son turunda "Torpedo"ya qarşı keçirilən matçın 18-ci dəqiqəsində zədələnərək meydanı tərk etməli olmuşdu. Xaçaturyanın zədəsi ciddi olduğundan məşqçilər korpusu onu Bakıya gətirməməyi qərara alıblar. Onun bərpası üçün ən azı bir həftə lazım olduğu bildirilir. Məlumatı Belarus klubunun rəsmi saytı yayıb.
Qeyd edək ki, AZAL ilə “Minsk” arasındakı ilk oyun iyunun 30-da Bakıda keçiriləcək.
