28 iyun 2011 19:36
Premyer Liqamıza vəsiqə qazanan klub dağıldı
2010-2011-ci il mövsümündə birinci divizionun qalibi kimi Premyer Liqaya vəsiqə qazanan “Abşeron” futbol klubu dağılıb. Azerisport.az xəbər verir ki, buna sponsorların klubu maliyyələşdirməkdən imtinası səbəb olub.
Artıq bu barədə məlumatı Peşəkar Futbol Liqasının (PFL) prezidenti Ramin Musayev və “Abşeron” klubunun prezidenti Yaşar Rüstəmov da təsdiqləyib. Beləliklə, daha bir klubumuz tarixin yaddaşına köçmüş olub.
Qeyd edək ki, birinci divizionun son mövsümündə Premyer Liqaya çempion “Abşeron”la yanaşı ikinci olmuş “Rəvan” vəsiqə qazanmışdı. Lakin “Abşeron”un imtinasından sonra birinci divizionda 3-cü pillədən sonrakı yerləri tutan klubların iştirak perspektivi yaranıb. Lakin bu klublardan hansının buna razı olacağı dəqiqləşməyib.
