28 iyun 2011 20:24
Xəzər Lənkəran üçün 2 braziliyalı futbolçu (FOTO)
Azərbaycan kubokunun qalibi “Xəzər Lənkəran” UEFA Avropa Liqasının hazırlıqlarını davam etdirir. Azerisport.az xəbər verir ki, bu gün komandanın Avstriyadakı düşərgəsinə daha iki futbolçu gəlib.
Hər iki futbolçunun Rumıniyanın "Steaua" klubundan dəvət olunduğu bildirilir. Belə ki, Rikardo Qomeş və Eder Bonfim 2010-2011 mövsümünü məhz bu klubda keçiriblər. Onlarla bu günlərdə rəsmi müqavilə imzalanacaq.
Qeyd edək ki, tam adı Rikardo Qomeş Vilana olan futbolçu 18 iyul 1981-ci ildə San Pauloda dünyaya gəlib. 29 yaşlı müdafiəyəmeyilli yarımmüdafiəçi Braziliyanın "Portuguesa" klubunda çıxış edib. 2006-cı ildə Rumıniyanın "Unirea" klubuna gələn futbolçu 2010-cu ilə qədər 66 oyunda 1 qol vurub. 2010-2011 mövsümünü "Steaua"da keçirən braziliyalı 16 dəfə meydana çıxıb.
2009-cu ildə "Unirea"nın heyətində Çempionlar Liqasının qrup mərhələsində çıxış edən və "Rangers"ə qarşı oyunda azarkeşlərin sevimlisinə çevirilən Rikardo 2008-2009 mövsümündə Rumıniya çempionu olub.
1981-ci ilin 2 aprelində Braziliyanın Mineyros şəhərində dünyaya gələn Eder Joze de Oliveyra Bonfim (Eder Bonfim) isə karyerasına 2000-ci ildə Braziliyanın "Gremio İnhumense" klubunda başlayıb (2000-2005, 18 oyun, 4 qol). Sağ cinah müdafiəçisi olan Bonfim 2002-2005-ci illərdə Portuqaliya klublarında icarə əsasında çıxış edib. 2002-ci ildə "Benfica"da (5 oyun), 2003-də "Estrela Amadora"da (15 oyun, 1 qol), 2003-2004 mövsümündə "Braga"da (27 oyun), 2004-2005-də "Vitoria"da (25 oyun) forma geyinən Bonfim 2005-ci ildə Portuqaliyanın "Uniao" klubuna transfer olunub (2005-2008, 76 oyun, 3 qol). 2008-2010-cu ildə Rumıniyanın " Timişoara " klubunda çıxış edən futbolçu (34 oyun) 2009-da "Gloria"nın uğurları üçün çalışıb (9 oyun). Onun son klubu "Steaua" olub (2010-2011, 19 oyun).
