29 iyun 2011 00:03
Qarabağ Litvada ilk məşqə çıxdı (FOTO)
İyunun 27-də təlim-məşq toplanışında olduğu Türkiyədən birbaşa Litvaya yola düşən və axşam saatlarında Klaypeda şəhərinə çatan “Qarabağ” burdakı “Amberton” otelində məskunlaşıb. Azerisport.az xəbər verir ki, oyunun süni meydançada olacağına baxmayaraq baş məşqçi Qurban Qurbanovun istəyi ilə təbii örtüklü Klaypeda mərkəzi arenası icarəyə götürülərək komandanın sərəncamına verilib.
Dünən isə yerli vaxtla 14:30-da başlayan ilk məşq 1 saat 15 dəqiqə davam edib. Yüngül isinmə hərəkətləri ilə məşqə başlayan komanda əsasən toplu hərəkətlərlə məşqi davam etdirib. Yerli mətbuatın da iştirak etdiyi məşq yüksək əhval-ruhiyyədə başa çatıb. Baş məşqçi Qurban Qurbanov yerli mətbuatın istəklərini nəzərə alaraq bir neçə mətbuat orqanına ayrı-ayrılıqda müsahibələr verərək komandasının durumu və rəqib haqqında fikirlərini bildirib.
Bu gün Ağdam klubu oyun öncəsi məşq üçün yerli vaxtla saat 17:30-da oyunun olacağı stadionda məşq edəcək, daha sonra mətbuat konfransı keçiriləcək.
