29 iyun 2011 13:36
Bolqarların baş məşqçisi: Azərbaycan əla heyətə malikdi
Boks üzrə Bolqarıstan milli komandasının baş məşqçisi Petr Losev Türkiyənin paytaxtı Ankarada başa çatan Avropa çempionatı ilə bağlı fikirlərini bölüşüb. Azerisport.az xəbər verir ki, o, qitə çempionatında bir çox yeni simaların parladığını deyib:
“Qitə çempionatı çox gərgin keçdi. Xüsusulə, orada yeni simaların parladığını deyə bilərəm”.
Bolqarıstanlı mütəxəssisin fikrincə, Avropada artıq qüvvələr nisbəti bərabərləşir: “Bu yarışda bir çox güclü komandalar iştirak edirdi. Rusiya, Azərbaycan, Ukrayna, Uels, Türkiyə və İrlandiya əla heyətə malik idi. Bunun üçün də onların hamısı medal qazandılar”.
Losev 91 kq çəki dərəcəsində həlledici görüşdə Teymur Məmmədova uduzan bolqarıstanlı Tervel Pulevin döyüşə hazır olmadığını deyib: “Onun burnunda problem var idi. Bunun üçün çətin nəfəs alırdı. Bundan əlavə, yarımfinaldakı döyüşdən sonra bərpa olunmağı bacarmadı”.
