29 iyun 2011 01:38
Avrokuboklarda yeni mövsüm səfər qələbələri ilə başladı
Avrokubokların 2011/2012 mövsümünə start verilib. Azerisport.az xəbər verir ki, qitəmiqyaslı yarışlar Çempionlar Liqasının ilk mərhələsinin iki oyunu ilə başlayıb.
Belə ki, qitənin ən mötəbər klub turnirində birinci təsnifat mərhələsinin ilk oyunları keçirilib. Məlum olduğu kimi, bu mərhələdə Avropanın reytinqinə görə ən zəif futbol ölkələrinin təmsilçiləri üz-üzə gəlir. Bu ölkələr isə Andorra, Lüksemburq, San-Marino və Maltadı.
Püşkə əsasən Andorra və Lüksemburq çempionları – müvafiq olaraq “Santa Coloma” ilə “Dudelange” üz-üzə gəlibsə, San-Marino ilə də Maltanın çempionları – “Tre Fiori”ylə “Valletta” növbəti mərhələyə vəsiqə uğrunda mübarizə aparır. Bu cütlər arasındakı ilk duellərin hər ikisində qonaqlar qələbəyə sevinən tərəf olublar. Belə ki, “Dudelange” səfərdə “Santa Coloma”nı 2 cavabsız qolla məğlub edib. “Tre Fiori” isə “Valletta”nın qapısından 3 cavabsız top keçirib. Beləcə, artıq bu cütlərdən növbəti mərhələyə kimlərin adlayacağı demək olar ki, elə ilk oyunlardan sonra müəyyənləşmiş olub.
Cırtdan ölkə təmsilçilərindən növbəti mərhələyə hansı komandaların adlayacağını isə rəsmi olaraq iyulun 5-6-da biləcəyik. Belə ki, “Dudelange” – “Santa Coloma” görüşü iyulun 5-də, “Valetta” – “Tre Fiori” görüşü isə bir gün sonra baş tutacaq və məhz bundan sonra iki ən güclü kollektiv ÇL-in ikinci təsnifat mərhələsinə vəsiqəni rəsmiləşdirmiş olacaq.
Maraq üçün onu da əlavə edək ki, ÇL-də çıxış edən Azərbaycan çempionu “Neftçi” mübarizəyə birbaşa ikinci təsnifat mərhələsindən qoşulacaq və Xorvatiyanın “Dinamo” (Zaqreb) klubuyla qarşılaşacaq. Bu komandalar arasındakı ilk görüş iyulun 13-də Zaqrebdə, cavab görüşü isə ayın 19-da Bakıda keçiriləcək.
Avropanın digər nüfuzlu klub turniri – Avropa Liqası isə iyunun 30-da start götürəcək və birinci təsnifat mərhələsində iki klubumuz – AZAL və “Qarabağ” mübarizəyə başlamış olacaq. Azərbaycan kubokunun sahibi “Xəzər Lənkəran” isə mübarizəyə ikinci təsnifat mərhələsindən başlayacaq.
Çempionlar Liqası
Birinci təsnifat mərhələsi
İlk oyunlar
28 iyun
Santa Coloma (Andorra) – Dudelange (Lüksemburq) – 0:2
Qollar: Leqros, 57, Kaylet, 79.
Tre Fiori (San-Marino) – Valletta (Malta) – 0:3
Qollar: Denni, 43, Effionq, 50, Aqius, 70-pen.
