29 iyun 2011 18:22
Azərbaycan futbolçu miqrasiyasına görə 16-cıdı
PFPO araşdırma qrupu ötən il üçün qlobal futbolçu miqrasiyaları hesabatını hazırlayıb. Azerisport.az xəbər verir ki, hesabata əsasən, 2010-cu il ərzində ən çox futbolçu Kiprə transfer olunub – 219 nəfər.
Bu siyahıda Azərbaycan 88 futbolçu ilə 16-cı mövqedə qərarlaşıb. Xaricdən ən çox oyunçu transfer edən klublarımız isə “Bakı” və “Xəzər Lənkəran” olub – hərəyə 12 futbolçu. Bu göstərici ilə klublarımız 16-25-ci pillələri bölüşürlər.
Premyer Liqaya transfer olunan futbolçuların orta yaş həddi isə 27,85 olub. Bu, müvafiq reytinq cədvəlində 9-cu göstəricidi. Ən çox futbolçu eksport etmiş klubumuz isə Zaqatalanın “Simurq” klubu olub. 12 futbolçusu ilə yollarını ayıran əyalət təmsilçisi müvafiq siyahıda 14-21-ci pillələri bölüşür.
Ölkələr üzrə futbolçuların re-eksport siyahısına İngiltərə başçılıq edir – 241 futbolçu. 61 futbolçu ilə Azərbaycan bu siyahıda 17-cidi. Dünyada ən çox transfer olunan isə braziliyalı futbolçular olub. Ötən mövsüm Premyer Liqaya 7 braziliyalı futbolçu transfer olunub ki, bu göstəriciyə görə ölkəmiz İspaniya ilə 10-11-ci pillələri bölüşür.
Qeyd edək ki, hesabat hazırlanarkən dünya üzrə 69 futbol federasiyasının 101 liqasında 2010-cu il ərzində baş tutmuş transferlər nəzərə alınıb.
