29 iyun 2011 18:42
Twente Cavadovla yollarını rəsmən ayırdı
Hollandiyanın “Twente” klubu Azərbaycan milli komandasının futbolçusu Vaqif Cavadovla vidalaşıb. Azerisport.az Enshede klubunun rəsmi saytına istinadən xəbər verir ki, 22 yaşlı hücumçu ilə 2014-cü ilin yayınadək nəzərdə tutulan müqavilə qarşılıqlı razılıq əsasında pozulub.
Tərəflər arasındakı aktiv məsləhətləşmələrdən sonra belə bir qərar qəbul olunub. “Twente” 2010-cu ilin qışında “Qarabağ”dan transfer etdiyi Cavadovdan elə də fayda görmədiyini bəyan edib.
Qeyd edək ki, Vaqif Cavadov ötən mövsümü icarə əsasında “Bakı”da keçirdikdən sonra Hollandiya klubunun düşərgəsinə qayıdıb. Hətta forvard “Twente”nin heyətində məşqə də çıxıb. Lakin Enshede təmsilçisinin yeni baş məşqçisi Ko Adrianse Cavadovun xidmətlərinə ehtiyac duymayıb.
Artıq azad agent statusu alan Vaqifin bundan sonrakı karyerasını harda davam etdirəcəyi maraqlı görünür. Hər halda böyük ehtimalla o, yerli klublardan birinə keçə bilər ki, bu mənada daha çox "Qəbələ" variantı inandırıcı görünür.
