29 iyun 2011 19:32
Nazim Süleymanov: Minsk`ə məğlubiyyət mənim üçün faciə olacaq
AZAL-ın baş məşqçisi Nazim Süleymanov sabah keçiriləcək Avropa Liqasının birinci təsnifat mərhələsinin Belarus “Minsk”i ilə oyun öncəsi bu gün mətbuat konfransı keçirib. Azerisport.az həmin mətbuat konfransından hazırlana reportajla sizi də tanış edir.
- Sizin üçün bu qarşılaşma avrokuboklarda bir debüt olacaq. Nə kimi hisslər var?
- Normal. Biz Avroliqaya üç mərhələdə hazırlaşdıq. 22 günlük hazırlıq keçdik. Amma hesab edirəm ki, bu, tam hazırlıq üçün hələ azdı. Biz sadəcə 70 faiz hazırlaşa bilmişik. Amma sabah oyun keçirməliyik. İlk oyun çox vacibdi. Evdə keçiriləcək matçda müsbət nəticə qazanmaq istəyirik.
- Siz uzun müddətdi oyun keçirmədiyiniz halda, “Minsk” Belarus çempionatında müntəzəm oyun keçirirdi...
- Biz tələbələrdən ibarət komandayla qarşılaşdıq, ikitərəfli görüşlər keçirdik. Əlbəttə, daha güclü rəqiblərlə də qarşılaşmaq istərdik. Amma alınmadı. Amma istənilən halda mən öz yetirmələrimə inanıram. Onların özlərini yaxşı tərəfdən göstərəcəklərinə əminəm.
- AZAL müdafiə futbolu oynayır. “Minsk”lə də belə oynayacaqsız?
- Biz müdafiə futbolu oynamırıq. Əks halda çempionatda o qədər qol vurmazdıq. Biz ilk oyunda qol vurmalıyıq. Buna görə də hücum etməliyik.
- Yeni futbolçularınızdan kimləri sifariş etmisiz?
- Bosniyalı müdafiəçi Branislav Arsenoviçi sifariş etdik. Əgər birinci mərhələni keçə bilsək, o zaman albaniyalı müdafiəçi Ervin Bulkunu da sifariş ərizəsinə daxil edəcəyik.
- İlk oyunda nəticə nə dərəcədə vacibdi?
- Çox vacibdi. Biz qol buraxmamaq şərtilə çox qol vurmalıyıq.
- Avrokuboklarda oynamısız. Bəs məşqçi kimi özünüzü necə hiss edirsiz?
- Bunlar fərqli şeylərdi. Oyunçu kimi ancaq qol vurmaq haqda düşünürdüm. İndi isə daha böyük məsuliyyət var. Mən indi matçın protokoluna daxil edəcəyim 18 futbolçudan oyun gözləyəcəm.
- Qvidas Yuşkanın əvəzində Elşən Məmmədov oynayacaq?
- Yuşka birinci mərhələdə yaxşı oynayırdı. Amma ikinci mərhələdə dayandı. “Altılıq” mərhələsində ümumiyyətlə qol vura bilmədi. Son oyunlarda da ürəkdən oynamırdı. Mən Elşənə inanıram. Amma hücumda başqa futbolçularımız da var.
- “Minsk” haqda ətraflı məlumat toplaya bilmisiz?
- Biz rəqib haqda kifayət qədər məlumat toplamışıq. Bilirik ki, son turda “Dinamo”ya 1:2 hesabıyla məğlub olublar. Komandamız hazırdı, onları keçməliyik. Onların güclü tərəfi əks-hücumlardı. Uzaqdan zərbələri sevirlər. Cərimə zərbələri təhlükəlidi. Amma “Minsk” Azərbaycan Premyer Liqasında ilk altılığa düşə bilməz. Bu komandanı mütləq keçməliyik. Bunu bacarmasam, onda AZAL-da niyə işləyirəm? Məğlub olsaq, mənim üçün faciə olacaq.
