1 iyul 2011 20:08
UEFA da açıqladı: Maris Verpakovski rəsmən Bakı`da
"Bakı"nın heyətini Latviya futbolunun canlı əfsanəsi – Maris Verpakovski ilə gücləndirməyə çalışdığını xəbər vermişdik. Azerisport.az xəbər verir ki, paytaxt klubu artıq bu transferi tam həll edib.
Düzdü, paytaxt klubu hələlik bu keçid barədə rəsmi açıqlama yaymağa tələsmir (“Bakı”nın rəsmi saytının son dövrlər əvvəlki fəaliyyətindən, operativliyindən qat-qat uzaq olması ayrı söhbətin mövzusudu). Amma artıq UEFA-nın rəsmi saytının Latviya bürosu bu transferin rəsmiləşdiyini bəyan edib. Xəbərdə “zolaqlılar”ın bu oyunçu ilə iki illik rəsmi müqavilə bağladığı bildirilir. Verpakovski isə artıq komandanın Sloveniyadakı təlim məşq toplanışına qoşulub.
Artıq Starkov özü də bu transferin rəsmiləşdiyini etiraf edib və həm də Latviya yığmasında rəhbərliyi altında çıxış edən hücumçunun klubuna keçidinə münasibətini açıqlayıb: “Şübhəsiz, Marisin çoxsaylı təkliflər arasından məhz “Bakı”nı seçməsindən çox razıyam. O, yetkin və təcrübəli ustadı. Bizə çox fayda verə bilər. Əminəm ki, Verpakovski üçün də bu keçid çox vacibdi. O, motivasiyasını qətiyyən itirmir və daha da inkişaf edə bilər”.
Qeyd edək ki, 31 yaşlı Verpakovski karyerası ərzində karyerası ərzində Latviyanın "Baltika", "Metalurg", "Skonto" klublarında çıxış edib və 2003-cü ildə "Dinamo"ya transfer olunub. 2007-2008-ci illərdə o, İspaniyanın " Getafe " və "Celta", Xorvatiyanın "Hajduk" və Yunanıstanın "Ergotelis" klblarına icarəyə verilib. Latviya millisində 86 oyun keçirib və 28 qola imza atıb.
Verpakovski 2 dəfə Latviya çempionluğunu (2001, 2002), 2 dəfə Latviya Kubokunu (2001, 2002), 1 dəfə Ukrayna çempionluğunu (2004), 2 dəfə Ukrayna Kubokunu (2005, 2006) qazanıb. 2001, 2003 və 2008-ci illərdə Latviya millisi ilə "Baltika Kuboku"nun qalibi olub.
