4 iyul 2011 16:02
Şahin Diniyevin yeni komandasını yaxından tanıyaq
Xəbər verdiyimiz kimi, Azərbaycan yığmasının sabiq baş məşqçisi Şahin Diniyev yenidən ölkə xaricində çalışacaq. Azerisport.az xəbər verir ki, bir müddət Rusiyanın "Terek" klubunun əvəzedici komandasına və əsas heyətinə başçılıq edən, həmçinin əsas komandada köməkçi məşqçi işləyən Diniyevin bu dəfəki ünvanı İran çempionatı olacaq.
Qonşu ölkə çempionatının güclülər dəstəsində çıxış edən "Rah Ahan"la anlaşan millimizin sabiq çalışdırıcısı iyulun 8-də rəsmi müqaviləyə imza ataraq, yeni işinə start verəcək. Biz isə onun klubu ilə sizi yaxından tanış etmək istərdik.
Tam adı "Rah Ahan Football Club Shahr-e-Rey" olan komanda 1937-ci ildə yaradılıb. Komanda ev oyunlarını Tehranın Ekbatan qəsəbəsindəki 15 min yerli "Rah Ahan" stadionunda keçirir. Klubun prezidenti Məhəmməd Həsən Ansarifarddı. Şahin Diniyev baş məşqçi postunda Mehdi Tartarı əvəzləyəək.
"Rah Ahan" 1937-ci ildə İran Dəmir Yolları İdarəsi tərəfindən yaradılıb və bu gün də klub məhz bu dövlət təşkilatının nəzdindədi. "Rah Ahan" uzun illər "İstiqlal" klubu üçün baza rolunu oynayıb. Belə ki, Dinyievin yeni komandası həmişə "İstiqlal" üçün oyunçu yetişdirib. Lakin son illər "Rah Ahan"dan "İstiqlal"a gedənlərin sayında azalma müşahidə olunur.
Tehranda yaradılan və uzun illər bu şəhəri təmsil edən komanda 2008-ci ildə Rey şəhərinə köçürülüb. Buna səbəb isə İran paytaxtında klubularının sayının çoxluğu olub.
"Rah Ahan"ın İran Pro Liqasına yüksəlişi qalmaqalla baş tutub. Belə ki, 2004-2005 mövsümündə aşağı dəstədə - Azadegan Liqasında çıxış edən komanda futbol federasiyası tərəfindən Pro Liqaya buraxılıb. Buna səbəb "Sənət Neft"lə bağlı qaldırılan məhkəmə iddiaları olub. 2005-2006 mövsündə "Sənət Neft"dən məhkəməyə bir neçə şikayət daxil olub və İran məhkəməsi bu klubun cəzalandırılmasına qərar verib. Bundan sonra "Rah Ahan" Pro Liqaya buraxılıb.
"Rah Ahan"ın Pro Liqadakı ən yaxşı nəticəsi 2008-2009 mövsümündə qeydə alınıb. Həmin mövsüm komanda 11-ci pilləni tutub və ölkə kubokunun finalına çıxıb. 2005-2006-da 13-cü, 2006-2007-də 16-cı, 2007-2008-də 12-ci olan komanda son mövsümdə 15-ci pilləni tutub.
"Rah Ahan"da əvvəllər İran əsas və aşağı yaş qrupları üzrə yığmalarında oynamış Farşid Kərimi, İbrahim Kərimi, Kamal Kamyabinya, Bahadur Abdi, Həsən Rudbarian, Məhəmməd Saleh Xəlil çıxış edir.
Ötən mövsüm komandada 4 legioner oynayıb. Bunlardan biri Suriya yığmasının üzvü Mahmud Əl Əmenahdı. Onunla yanaşı braziliyalılar - Rodriqinyo, Rikardinyo və litvalı Mantas Savenas komandanın uğurları üçün çalışıb.
