4 iyul 2011 18:48
Vaqif Cavadovun komandası islahatlara başladı
Azərbaycan yığmasının hücumçusu Vaqif Cavadovun yeni transfer olduğu Rusiyanın "Volqa" klubunun heyətində islahatlar başlayıb. Azerisport.az Nijni-Novqorod klubunun rəsmi saytına istinadən xəbər verir ki, komanda 5 üzvü ilə yollarını ayırıb.
"Volqa" braziliyalı müdafiəçi Silva dos Santos Leylton, rus arxa xətt oyunçusu Aleksey Aravin, yerli yarımmüdafiəçilər - Maksim Burçenko, Maksim Zyuzin və Sergey Yaşin transferə çıxarılıb. Rəhbərlik onlara təşəkkür edib və özlərinə yeni klub tapmağı məsləhət görüb.
Qeyd edək ki, "Volqa" təlim-məşq toplanışı keçmək üçün dünən Avstriyaya yollanıb. Komanda iyulun 15-dək Leoben şəhərində toplanışda olacaq. Toplanışa 30 futbolçu aparılıb. Yeni transferlər Vaqif Cavadov, Dani Bondarv, Yanos Szekeli, əvəzedici komandadan əsas heyətə qaytarılan Şota Bibilov və Tiflis "Dinamo"sundan icarədən dönən Petar Yeliç də onların arasındadı. Avstriyada isə komandaya 4 yeni oyunçunun qoşulacağı gözlənilir.
"Volqa" Avstriyada üç yoxlama oyunu keçirəcək. İyulun 7-də Danimarka "Copenhagen"lə qarşılaşacaq nijni-novqorodluolar 5 gün sonra İngiltərənin "Şeffild Uinsdey" klubu ilə üz-üzə gələcək. Son sınaq matçı isə iyulun 14-də Təl-Əviv "Hapoel"inə (İsrail) qarşı olacaq.
