5 iyul 2011 00:26
Petar Zlatinov: Bütün bunlar şayiədi
“İnter”in bolqar pleymeykeri Petar Zlatinov müsahibəsində istirahətindən danışıb, Türkiyə toplanışı barədə fikirlərini açıqlayıb. Azerisport.az həmin müsahibə ilə sizi də tanış edir.
- Mövsümün başa çatmasından sonra şayiələr gəzdi ki, komandadan ayrılacaqsan...
- Amma mən “İnter”də qaldım. Buna görə çox şadam. Xoşdu ki, bizə ortaq məxrəcə gəlmək və yeni müqavilə imzalamaq müyəssər oldu. Mənim “İnter”dən getmək məsələm heç müzakirə olunmurdu. Bütün bunlar şayiədi. Ümid edirəm ki, bu mövsüm komanda özünü yalnız yaxşı tərəfdən göstərəcək və mütləq yüksək yerlər uğrunda mübarizə aparacaq. Mən isə öz növbəmdə “İnter”in hər oyunda qalib gəlməsi üçün əlimdən gələni etməyə çalışacağam.
- Amma hər mənfinin müsbət tərəfi də var. Belə ki, komanda avrokuboklara vəsiqə qazana bilmədi, ancaq bu, futbolçulara yaxşı istirahət etməyə imkan yaratdı. Bilmək istərdik, istirahətini necə keçirdin?
- Bütün ailə üzvlərinin toplaşdığı evdə dincəldim. Məzuniyyəti yaxşı keçirdim, deyim ki, son 3 ildə biz əməlli-başlı istirahət edə bilməmişdik. Bizə avrokuboklarda oynamaq mümkün olmadı, ancaq yaxşı istirahət etmək imkanı yarandı. Ümid edirəm ki, növbəti mövsümdə biz daha yaxşı çıxış edəcəyik və Avropaya düşəcəyik.
- Hazırlıqlar necə keçir?
- Normal. Toplanış plana uyğun keçir, bütün futbolçular məşqçilərin tapşırıqlarını ciddi-cəhdlə yerinə yetirirlər. Sevindirir ki, zədəli futbolçular yoxdu. Biz anlayırıq ki, yaxşı istirahətdən sonra yaxşı hazırlaşmaq lazımdı, axı, bu, bu mövsüm uğurlu çıxış etməyimiz üçün çox vacibdi.
- Bilirik ki, ailənizdə futbol oynayan çoxdu. Atan isə ailənizdə ən yaxşı futbolçu kimi məhz səni fərqləndirib...
- Mənə çox xoşdu ki, o, belə hesab edir. Hələlik mən atamdan və qardaşımdan daha çox uğur qazanmışam. Ancaq qardaşım Vladislav hələ çox gəncdi və düşünürəm ki, bütün onun uğurları hələ qarşıdadı.
- Karyerasını Azərbaycanda davam etdirməyi qardaşına məsləhət görərdinmi?
- Bu, taledi. Qismətdirsə, o zaman mütləq Azərbaycanda oynayacaq. Qismət deyilsə, oynamayacaq. Qardaşımın öz, mənim başqa yolum var. Səmimi qəlbdən istərdim ki, Vladislav Avropanın səviyyəli komandalarının birində çıxış etsin. İstərdim ki, onun karyerası uğurlu olsun.
