6 iyul 2011 13:09
Minsk – AZAL matçı 1 dəqiqəlik sükutla başlaya bilər
UEFA Avropa Liqasının Belarus “Minsk”i ilə AZAL arasında keçiriləcək birinci təsnifat mərhələsinin cavab görüşü bir dəqiqəlik sükutla başlayaca bilər. Azerisport.az xəbər verir ki, buna Azərbaycana məxsus nəqliyyat təyyarəsinin Əfqanıstanın paytaxtı Kabildən şimalda yerləşən Pərvan əyalətində qəzaya uğraması səbəb olub.
Qeyd edək ki, qəza iyulun 5-də Bakı vaxtı ilə saat 23:00-da Kurband qəzasının Siyah Gərd yaşayış məntəqəsi yaxınlığında baş verib. Təyyarənin göyərtəsində 9 ekipaj üzvü olub. Hələlik təyyarənin ekipajının taleyi barədə heç bir məlumat yoxdu.
Lakin böyük ehtimalla həyatını itirən həmin şəxslərin xatirəsini yad etmək məqsədilə AZAL rəhbərliyi məhz belə bir addım atmaq niyyətindədi. Onların bu istəyinə UEFA-nın razılıq verib-verməyəcəyi isə bilinmir.
“Minsk” – AZAL görüşü sabah Belarus paytaxtı Minskdə, “Dinamo” stadionunda keçiriləcək və Bakı vaxtı ilə saat 22:00-da start götürəcək.
