6 iyul 2011 19:00
Türkiyə polisindən şok açıqlama
Türkiyə futboluna damğa vuran rüşvət və danışılmış oyunlarla bağlı əməliyyatların aparıldığı bir vaxtda qonşu ölkə polisi şok açıqlama ilə çıxış edib. Azerisport.az xəbər verir ki, hüquq mühafizə orqanları qardaş ölkə futbolundakı anormallıqların göründüyündən də çox olduğunu bəyan edib.
Məlum olub ki, bu günədək aparılan araşdırmalar zamanı 8 qeydiyyatdan keçməyən silah aşkarlanaraq götürülüb. Türkiyə futbolunda danışılmış oyunların sayı isə ən azı 19-du.
Bu oyunlar həm Bank Asya birinci liqa, həm də Superliqa komandaları arasında gerçəkləşib. Artıq həmin oyunların nəticəsinin öncədən razılaşdırıldığı faktlarla sübut da olunub. Lakin həmin matçların siyahısı açıqlanmır.
Bütün bunlar azmış kimi polis əksər klublarda futbolçu transferlərindən də haqsız qazanc əldə edildiyini bildirib. Bunun üçün klublar hətta xüsusi güc qüvvələri də yaradaraq, həmin hərəkətlərinin üstünü ört-basdır edirmişlər. Belə şəxslər futbolçulara hədə-qorxu gəlməklə onların alacaqlarından imtinasına da nail olublar.
Qeyd edək ki, istintaq hələ də davam edir və qarşıdakı günlərdə daha geniş məlumatların üzə çıxacağı istisna deyil.
