6 iyul 2011 20:51
İnter Superliqa klubu ilə sülh bağladı (YENİLƏNİB)
Türkiyənin İsparta şəhərində təlim-məşq toplanışında olan "İnter" bu gün ikinci yoxlama oyunu keçirib. Azerisport.az xəbər verir ki, bank klubunun rəqibi Türkiyə Super Liqasına yenicə vəsiqə qazanan "Mersin İdman Yurdu" klubu olub.
"Sirene Devras" otelinin meydançasında baş tutan oyun Bakı klubu üçün yaxşı başlayıb. Belə ki, 17 və 35-ci dəqiqədə Karlsonun dublu sayəsində "bankirlər" ilk yarını üstün başa vurub. Lakin ikinci hissəyə daha yaxşı başlayan türklər 52 və 60-cı dəqiqələrdə vurulan qollarla hesabı bərabərləşdirib. Kaxaber Sxadadzenin yetirmələri görüşün başa çatmasına 3 dəqiqə qalmış yenidən hesabda önə keçiblər. Amma türklər son saniyələrdə bu qolun da əvəzini çıxıblar və beləcə qarşılaşma 3:3 hesablı heç-heçə ilə bitib.
Qeyd edək ki, "Mersin İdman Yurdu" heyətinə Mert Nobre və Öndər Turacı kimi məşhur futbolçuları qatıb. Komandanı Nurullah Sağlam çalışdırır. Ötən mövsüm millimizin sabiq üzvləri - İlqar Qurbanov və Ernani Pereyra bu komanda da çıxış edib. İlqar qış fasiləsində, Ernani isə mövsüm başa çatanqdan sonra komandadan ayrılıb.
Onu da xatırladaq ki, "İnter" Türkiyədəki ilk yoxlama oyununda Ukraynanın "Metallurg" (Zaporojye) klubunu 4:0 hesabı ilə məğlub etmişdi.
Yoldaşlıq oyunu
6 iyul
İnter – Mersin İdman Yurdu - 3:3 (2:0)
Qollar: Girt Karlson, 17 (1:0), Girt Karlson, 35 (2:0), Baçana Tsxadadze, 87 (3:2).
