8 iyul 2011 12:43
9 sarı + 2 qırmızı + 2 qol = 2:0
Amerika kubokunda Argentinada təşkil olunan Amerika Kuboku davam edir. Azerisport.az xəbər verir ki, ötən gecə turnirin A qrupu çərçivəsində daha bir görüş keçirilib.
Bu dəfə Boliviya və Kosta Rika yığmaları qarşı-qarşıya gəlib. Olduqca gərgin keçən oyunda hakim düz 11 dəfə əlini cibinə atmalı olub ki, bunlardan da ikisi qırmızı vərəqə olub. Hər iki qırmızı vərəqə Boliviya yığmasının futbolçusuna göstəriilib. 71-ci dəqiqədə Ronald Rivero, 77-ci dəqiqədə isə Valter Alberto Flores meydandan kənarlaşdırılıb. Bundan başqa Boliviya yığmasına 6, Kosta Rikaya isə 3 sarı vərəqə göstərilib.
Oyun isə Kosta Rikanın 2:0 hesablı qələbəsi ilə yekunlaşıb. Hesabı 60-cı dəqiqədə Joze Martines açıb. 79-cu dəqiqədə isə Coel Kempbell matçın nəticəsini müəyyənləşdirib.
Qeyd edək ki, bu qrupda meydan sahibi Argentina da yer alıb. Hər iki oyunda 1 xal qazanan argentinalılar iki xalla qrup üçüncüsüdü. Qrupa 4 xalla Kolumbiya başçılıq edir. İkinci pillədəki Kosta Rikanın 3 xalı var. Boliviya isə 1 xalla sonuncudu.
Sonda onu da əlavə edək ki, bu gecə turnirin C qrupunda Uruqvay Çili ilə, Peru isə Meksika ilə qarşılaşacaq.
Amerika Kuboku
A qrupu
2-ci tur
6 iyul
Boliviya – Kosta Rika – 0:2
Qollar: Joze Martines, 60, Coel Kempbell, 79.
