10 iyul 2011 00:33
İnter qələbəni əldən verdi (FOTOLAR)
Xəbər verdiyimiz kimi, Türkiyənin İsparta şəhərində təlim-məşq toplanışını davam etdirən "İnter" növbəti yoxlama görüşünü keçirib. Azerisport.az xəbər verir ki, “bankirlər” Rusiya Premyer Liqasında çıxış edən "Terek" klubu ilə qarşılaşıb və məğlub olub.
"İnter" meydana bu start heyətilə çıxıb: Georgi Lomaya, Arif Daşdəmirov, Valeri Abramidze, Vladimir Levin (k), İlia Kandelaki, Bronislav Çervenka, Samir Zərgərov, Asif Məmmədov, Petar Zlatinov, Girt Karlson və baxışda olan futbolçu (klubla müqaviləsi olmadan onun adı açıqlanmır).
İlk dəqiqələrdən meydanda bərabər mübarizə gedib. Hissənin sonunda isə "İnter" hesabı açmağa müvəffəq olub. 40-cı dəqiqədə "Terek"ın qapıçısı Petar Zlatinovun zərbəsindən sonra komandasını ilk anda xilas edib, lakin epizodun davamında Karlson topu boş qapıdan keçirməyə nail olub.
Ötən yoxlama görüşlərdə olduğu kimi, bu dəfə də Kaxaber Tsxadadze fasilədə heyətdə dəyişikliyə əl atıb. Baş məşqçi meydana Səlahət Ağayev, Xəyal Mustafayev, Rüstəm Abbasov, Ruslan Poladov, Nizami Haciyev, Daniel Genov, Şəhriyar Rəhimov, Baçana Tsxadadze və baxışda olan digər futbolçunu buraxıb. İkinci hissənin gedişində gürcü mütəxəssis daha iki əvəzetməyə əl atıb. O, Elnur Abdulovla Asif Miriliyə də şans verib.
İkinci hissənin əvvəlində "Terek" hesabı bərabərləşdirib. Çox keçmədən komanda qapısında ikinci qolu görüb. Buraxılan qollardan sonra "İnter" irəli atılsa da hesabı dəyişə bilməyib. Beləliklə, görüş 2:1 hesabı ilə "Terek"ın xeyirinə başa çatıb.
Qeyd edək ki, bu “İnter”in Türkiyədəki toplanış çərçivəsində axırıncı yoldaşlıq görüşü idi. Xatırladaq ki, birinci yoxlama oyununda "İnter" Ukraynanın "Metallurg"(Zaporojye) klubunu 4:0 hesabı ilə məğlub etmişdi. İkinci görüşdə isə komanda Türkiyənin "Mersin İdman Yurdu" kollektivi ilə sülh bağlamışdı - 3:3.
