10 iyul 2011 12:35
Azarkeşlər Neftçidən Zaqrebdə qol gözləyirlər
Azərbaycan çempionu “Neftçi”nin UEFA Çempionlar Liqasının ikinci təsnifat mərhələsi çərçivəsindəki rəqibi olan Xorvatiya “Dinamo”su ilə Zaqrebdəki oyununda qələbə qazanmaq şansları o qədər də yüksək deyil. Azerisport.az xəbər verir ki, belə deməyə saytımızda apardığımız sorğunun nəticələri əsas verir.
Belə ki, oxucularımız arasında bu oyunda hansı hesabın qeydə alınacağına dair apardığımız sorğuya qatılanların əksəri komandamızın məğlub olacağını düşünür. Lakin onlar “Neftçi”nin ən azı səfər qoluna imza atacağını proqnozlaşdırırlar. Yəni respondentlərin 18 faizi məhz “Dinamo”nun 2:1 hesablı qələbə qazanacağını gözləyir.
Bundan bir qədər az – respondentlərin 17 faizi isə hətta “Neftçi”nin Zaqrebdə 1:1 hesablı heç-heçə etməsini də mümkün sayır. “Neftçi”nin səfərdə 2:1 hesabıyla qələbəsinə inanlar da var – 14 faiz. Amma təbii ki, başqa hesabların qeydə alınacağını düşünənlər də az deyil.
