11 iyul 2011 15:31
Haciyevskinin Azərbaycana dönüşü niyə baş tutmayıb?
Futbol üzrə Azərbaycan yığmasının, eləcə də “Bakı” və “Simurq” klublarının sabiq baş məşqçisi Qyoko Haciyevskinin bundan sonra Səudiyyə Ərəbistanında, bir qədər də dəqiqləşdirsək, bu ölkənin “Najran” klubunda çalışacağını xəbər vermişdik. Makedoniyalı mütəxəssis azerisport.az saytına müsahibəsində ölkəsinin yığmasını çalışdırmaq əvəzinə ərəblərlə anlaşmasının səbəblərini açıqlayıb.
“Birinci növbədə onu deməliyəm ki, burda (Səudiyyə Ərəbistanında – azerisport.az) çox istidi. Mənim üçün gündüzlər çölə çıxmaq çox çətindi. Günəşli və isti hava hökm sürməkdədi. Amma mənə təklif olunan şərtlər tam qane etdiyindən, bu dəvəti qəbul etdim” – deyə, makedoniyalı mütəxəssis dilə gətirib.
Haciyevski üçün bu, ilk belə ekzotik sınaq deyil. Çünki o, vaxtilə Yaponiyada da “Dzubilo İvata” klubunda çalışıb. Amma aydın məsələdi ki, ərəb ölkəsi Yaponiyadan çox fərqlənir: “Deyə bilmərəm ki, Səudiyyə Ərəbistanı mənə Azərbaycanı xatırladır. İstənilən halda Bakı daha koloritli ölkədi. Amma bütövlükdə bura da xoşuma gəlir”.
Bu il Haciyevski yenidən ölkəmizə qayıda bilərdi. Söhbət heç də hansısa klubumuzun bu mütəxəssisi geri qaytarmaq istəyindən getmir. Makedoniya Futbol Federasiyası onu ölkənin yığmasının sükanı arxasına gətirmək istəyirdi. Bu komanda isə avqustun 10-da Bakıda millimizin qonağı olacaq. Lakin Haciyevskinin yığmanın baş məşqçisi olması reallaşmadı. 15 il sonra yenidən Makedoniya yığmasını onun çalışdıracağına dair gözləntilər baş tutmadı. Bəs görəsən, məşqçi özü bu barədə nə düşünür?
“Düzü, mənimlə danışıqlar aparıldı. Federasiyanın mənzil-qərargahına çağırmışdılar. Txəminən bir ay öncə dedilər ki, iki həftəyə hər şeyə aydınlıq gətirəcəyik. Amma bu müddət ərzində federasiyadan heç bir xəbər-ətər yoxdu. Mənə isə komandanı komplektləşdirmək, hazırlaşdırmaq lazım idi. Buna görə də qərar verdim ki, daha gözləməyə dəyməz. Nəticədə Səudiyyə Ərəbistanına gəlməyə üstünlük verdim”.
Qeyd edək ki, Haciyevskinin yeni komandası ötən mövsüm 12-ci yeri tutub. Makedoniyalı mütəxəssis qarşısına qoyulan vəzifəni də açıqlayıb: Qarşımıza mümkün qədər yaxşı çıxış etmək vəzifəsi qoyulub”.
