12 iyul 2011 00:05
Danışılmış oyunlara Beşiktaşlıları da qatdılar
Türkiyə futbolunda danışılmış oyunlarla bağlı aparılan istintaq çərçivəsində dindirilməyə çağırılan futbol adamlarının sayı hər gün artmaqda davam edir. Azerisport.az xəbər verir ki, ötən gün 20-dən çox adam bu əməliyyatlarla əlaqədar hüquq mühafizə orqanları tərəfindən istintaqa cəlb olunub.
Bu mənada “Beşiktaş”ın vitse-prezidenti Serdal Adalı ifadə vermək üçün İstanbula çağırılıb. Klubla birliklə Avstriyada təlim-məşq toplanışında olan Serdal Adalıya telefon açan polis onun İstanbula qayıtmasını tələb edib.
Onunla yanaşı “Beşiktaş”ın baş məşqçisi Tayfur Havutçu ilə bu klubun sabiq rəsmilərindən olan Sinan Engin de ifadə vermək üçün polisə çağırılıb.
Amma siyahı bu şəxslərlə yekunlaşmır. Belə ki, Yılmaz Vural və “Sivasspor”un baş məşqçisi Rıza Çalımbay da ifade verməyə çağırılıb.
“Trabzonspor “un vitse-prezidenti Nevzat Şakar Atatürk Hava limanında saxlanılıbsa, “İstanbul Büyükşehir Belediyespor”da forma geyən İbrahim Akın və İskender Alın Sloveniyadakı təlim-məşq toplanışından geri çağırılıb.
Qeyd edək ki, dünən səhər saatlarında “Trabzonspor”un prezidenti Sadri Şener və Türkiyə Futbol Federasiyasının sabiq prezidenti Mahmut Özgener də saxlanılmışdı.
