11 iyul 2011 00:26
“Neftçi`ni keçəcək dərəcədə gücümüzün olduğuna əminik”
Xorvatiya çempionu “Dinamo”nun (Zaqreb) idman direktoru Zoran Mamiç komandasının UEFA Çempionlar Liqasının ikinci təsnifat mərhələsinə hazırlığını dəyərləndirib. Azerisport.az xəbər verir ki, o, Zaqreb klubunun rəqibi olacaq “Neftçi”dən də danışıb.
“Əlbəttə, komanda hələ optimal vəziyyətdə deyil.Amma biz bilirik ki, qısa zaman kəsiyində ideal forma yığmaq da mümkünsüzdü. İstənilən halda əminik ki, bizim “Neftçi”ni keçəcək dərəcədə gücümüz var” – deyə, Mamiç sözə başlayıb.
Onun sözlərinə görə, gələcəyə optimist baxmağa əsasları var: “Çünki biz ötən mövsümkü komandanın özəyini saxlaya bilmişik. Üstəlik, onlara dörd yüksək səviyyəli yeni futbolçu da qoşulub. Hazırda İqor Bişçan və Tomislav Barbariçdən başqa zədəlimiz yoxdu. Qalan bütün futbolçular tam sağlamdılar və qarşıdakı oyunlara hazırlaşırlar. Bizim yaxşı oyun göstərməyə və müsbət nəticə qazanmağa yetərincə gücümüz var və narahatlığa heç bir əsas yoxdu”.
Mamiç Zaqrebdə keçiriləcək ilk oyunda komandasını hansı nəticənin qane edəcəyinə də münasibətini bildirib: “Çox istəyirəm ki, ilk oyunda qazanacağımız nəticə cavab matçına daha rahat hazırlaşmağımıza şərait yaradacaq şəkildə olsun”.
“Neftçi”dən danışan “Dinamo” rəsmisi bunları dilə gətirib: “Neftçi” yaxşı komandadı. Maraqlı futbolçuları var. Əminəm ki, azərbaycanlılar “Maksimir”də müdafiədən oynamağa üstünlük verəcək. Axı biz həmişə bir şeyin şahidi olmuşuq ki, “Dinamo” evə müdafiədə oturmur, ancaq hücum edir. Fikrimcə, rəqib komandanın əsas işi məhz həmin hücumlarımızın qarşısını almaq olacaq. Amma bizim daha çox şeylər bacara bilən komandamız var. İndi “Dinamo” daha güclü olub”.
Mamiç sonda “Maksimir”ə toplaşacaq azarkeş sayından da danışıb: “Həmin gün stadiona 20 mindən az azarkeş gəlsə, mən çox məyus olacam”.
