12 iyul 2011 13:22
Boyan Pavloviç: Streymur Bangadan daha güclüdü
“Qarabağ”ın qapıçısı Boyan Pavloviç azerisport.az saytına müsahibəsində UEFA Avropa Liqasının ikinci təsnifat mərhələsi çərçivəsində qarşılaşacaqları Farer adalarının “Streymur” klubu ilə dueldəki şanslarından danışıb.
“Biz artıq “Streymur”la matçın hazırlıqlarına başlamışıq. Bilirik ki, rəqibimiz sıradan komanda deyil. Amma istənilən halda biz Farer adalarına qələbə dalınca yollanırıq. Hesab edirəm ki, “Streymur” bundan əvvəlki rəqibimiz olan Litva “Banga”sından daha güclüdü və bizə daha çox çətinlik yarada bilər”.
Lakin serbiyalı qapıçı bu komandaların heç birinin öz klubundan güclü olmadığı qənaətindədi: “Təbii ki, onları ayrı-ayrılıqda götürdükdə heç biri “Qarabağ”dan güclü deyil. Buna görə də biz farerliləri də mübarizədən kənarlaşdırmağa borcluyuq”.
Lakin Pavloviç hadisələri qabaqlamağı da məqsədəuyğun saymır: “İstənilən halda biz meydana çıxıb öz oyunumuzu göstərməyə və sərfəli nəticə qazanmağa çalışacağıq. Amma asan qələbə qazanacağımızı düşünmürəm. Əgər biz öz oyunumuzu göstərə bilsək, o zaman “Streymur” bizə əlavə çətinlik yarada bilməz”.
“Biz onların bəzi oyunlarının videoyazısında baxmışıq. Buna uyğun da hazırlaşmağa çalışırıq. Onlar həqiqətən də futbol oynamağı bacarırlar. Mən, eləcə də bütün komanda Farer adalarının təmsilçisiylə oyuna hazırıq. Sadəcə çıxıb öz oyunumuzu göstərmək qalır” – deyə qapıçı qeyd edib.
Pavloviç həmçinin digər təmsilçilərimizin də şanslarından danışıb: “Hesab edirəm ki, həm “Neftçi”nin “Dinamo”nu, həm də “Xəzər Lənkəran”ın “Maccabi”ni keçməyə şansı var. Düzdü, onların rəqibləri elə də zəif komandalar deyil. Amma onlar hər ikisi ilk oyunlarını səfərdə keçirirlər və evə sərfəli nəticə ilə qayıtmaqla uğur qazana bilərlər. Məsələn, bilirəm ki, “Dinamo” çox yaxşı komandadı. Amma “Neftçi”nin də zəif komanda olmadığı məlumdu”.
