13 iyul 2011 01:20
AZAL-ın yeni baş məşqçisi müəyyənləşdi
AZAL-ın yeni baş məşqçisinin kimliyi müəyyənləşib. Azerisport.az xəbər verir ki, “təyyarəçilər”i bundan sonra Elxan Abdullayev çalışdıracaq.
Qeyd edək ki, paytaxt klubu Nazim Süleymanovun hələ Belarusda “Minsk”ə yenilgidən sonra istefa verdiyi andan bəri yeni baş məşqçiyə tapşırılacağı gözlənilən idi. Lakin klub prezidenti Vaqif Qasımov Süleymanovun istefasını qəbul etmədiyini və onu postunda saxlamaq istədiyini bildirirdi. Dünən tərəflər arasındakı son görüşdə isə Süleymanov qərarını dəyişməyəcəyini və getməkdə israrlı olduğunu bildirincə, Qasımov yeni məşqçi axtarışlarına start verib.
Maraqlıdı ki, o, bunun üçün çox fikirləşməyib. Belə ki, Qasımov Elxan Abdullayevlə danışıqlar aparıb və qısa söhbətdən sonra tərəflər razılığa gəliblər.
Qeyd edək ki, Abdullayev son olaraq Qazaxıstanın “Atırau” klubunda Ramiz Məmmədovun köməkçisi vəzifəsində çalışırdı.
