13 iyul 2011 18:37
Rodriqinyo: Hər şeyə meydanda aydınlıq gələcək
Azərbaycan çempionu “Neftçi”nin aparıcı oyunçularından olan braziliyalı yarımmüdafiəçi Rodriqinyo azerisport.az saytına müsahibəsində UEFA Çempionlar Liqasındakı şanslarından danışıb.
- Xorvatiya mətbuatı “Dinamo” – “Neftçi” oyunu öncəsi sizin Sammirlə dostluğunuzu daha çox müzakirə edir...
- (gülür) O, mənim dostumdu. Öz ölkəmizdə qısa müddətdə də olsa, birgə top qovmuşuq. Amma indi o, “Dinamo”nu təmsil edir, mənsə “Neftçi”ni. Düşünürəm ki, dostluğumuz bir-birimizə qarşı tam güclə oynamağımıza mane olmayacaq.
- Yəqin ki, püşkatmadan sonra bu oyunları çox müzakirə etmisiz...
- Oyunlar barədə bir kəlmə də danışmamışıq. Amma belə onunla internetlə çox tez-tez danışıram. Adətən ailə və kənar məsələlərlə bağlı söhbətləşirik.
- Çox yaxından tanıdığınız birinin komandasına qarşı oynamaq necə hissdi?
- Mənim üçün bu, normalı haldı. Çünki ilk dəfə deyil ki, öz tanışlarıma qarşı forma geymiş olacam.
- “Neftçi”nin “Dinamo” ilə düşməsinə sevinmişdiz?
- Mən Sammiri çoxdan görmürdüm. Odu ki, onunla yenidən görüşmək mənim üçün çox xoş olacaq. “Dinamo”ya gəlincə, bu klub həqiqətən güclüdü. Amma hər şeyin necə olacağını oyunlar göstərəcək.
- Bakıya hansı hesabla qayıtmaq istərdiniz?
- Mən “Neftçi”nin Zaqrebdə yaxşı oyun göstərməsini gözləyirəm. Belə olan halda müsbət nəticəyə də nail olacağıq.
- Hətta “Dinamo” cütün favoriti göstərilsə də?
- Qoy göstərilsin. Bilirsiz ki, hər şeyə meydanda aydınlıq gələcək.
