13 iyul 2011 21:57
Bakı`nın Bakı toplanışı start götürdü
“Bakı” növbəti mövsümün hazırlıqlarının Bakı mərhələsinə bu gün keçirdiyi bir məqşlə start verib. Azerisport.az xəbər verir ki, saat 19:00-da klubun təlim-məşq bazasında baş tutan məşq bir saat davam edib. İlk məşq fiziki təmrinlərlə başlayıb, topla çalışmalarla yekunlaşıb.
Məşqdə cərrahiyyə əməliyyatı keçirən və bərpa prosesi keçən Əziz Quliyev və 9 iyulda Xorvatiyanın “İstra” klubu ilə oyunda topuğundan zədə alan Uinston Parks həkim nəzarəti altında fərdi məşq keçiblər. Bildirək ki, Parksın zədəsi ciddi deyil və iki gündən sonra komanda ilə birgə çalışacaq.
Qeyd edək ki, komandanın bu gün keçirilən məşqində 3 futbolçu iştirak etmirdi. 19 yaşlılardan ibarət milli komandanın düşərgəsində olan Nurlan Novruzov, Rəhman Hacıyev və pasportunda yaranan problem səbəbindən Syerra-Leoneyə yollanan İbrahim Karqbo komandaya bir neçə gündən sonra qoşulacaqlar.
Əlavə etmək yerinə düşər ki, sabahdan məşqlərin intensivliyi artırılacaq və futbolçular gündə 2 dəfə məşqə çıxacaqlar. 2 gün sonra, daha dəqiq desək, 15 iyul tarixində ikitərəfli oyun keçirilməsi planlaşdırılır.
17 iyulda yenidən Sloveniyaya yollanacaq “Bakı” 12 gün ərzində məşq edəcək və 4 yoldaşlıq oyunu keçirəcək.
