14 iyul 2011 12:31
Redniklə Kamran Təl-Əvivdə iddialı danışdı
“Xəzər Lənkəran”ın baş məşqçisi Mirça Rednik Avropa Liqasının ikinci təsnifat mərhələsinin ilk oyunu çərçivəsində bu gün keçiriləcək “Maccabi” (Təl-Əviv, İsrail) ilə qarşılaşma öncəsi mətbuat konfransı keçirib. Azerisport.az xəbər verir ki, Redniklə yanaşı komandamızın kapitanı Kamran Ağayev də KİV təmsilçilərinin önünə çıxıb.
“Xəzər Lənkəran”ın baş məşqçisi Mirça Rednik azərbaycanlı və israilli jurnalistlərin suallarını cavablandıraraq bunları deyib: “Siz düşünə bilərsiniz ki, biz bura məğlub olmağa gəlmişik və zəif bir komandayıq. Məncə isə bizim kifayət qədər güclü heyətimiz var və bu heyətlə şansımız da az deyil. Əlbəttə, “Maccabi” güclü rəqibdi, onların böyük təcrübəsi var. Biz onların gücünü qiymətləndiririk”.
Rumıniyalı mütəxəssis Azərbaycan futbolunun inkişafda olduğunu deyərək, bildirib ki, bir neçə il sonra da Avropa mətbuatı Azərbaycan futbolu haqqında daha yaxşı fikirdə olacaq.
Yerli mətbuatın komandamız haqqında suallarına Rednik belə cavab verib: “Mənim komandam haqqında məlumatı gərək özünüz toplayaydınız. Bununla belə deyim ki, heyətimizdə Azərbaycan yığmasının əsas oyunçuları, Avropa Liqasında və Çempionlar Liqasında çıxış etmiş futbolçular var”.
Start heyətini müəyyən edib-etmədiyi barədə suala Mirça müsbət cavab verdi: “Bəli, start heyətini tam müəyyən etmişəm. Komandada gözəl əhval-ruhiyyə var, və ümid edirəm ki, oyunçular bu motivasiyanı meydana daşıya biləcəklər”.
“Xəzər Lənkəran”ın kapitanı Kamran Ağayev də ona ünvanlanan sualları cavablandırıb. İsrail mətbuat nümayəndələri qapıçıdan “Maccabi”nin hücumçularının oyununu incələdiyi barədə sual veriblər. Kamran bu suala belə münasibət bildirib: “Mən heç bir futbolçunun oyunu incələməmişəm və məncə buna ehtiyac da yoxdu. Bizim güclü baş məqçimiz var və o rəqibin oyununu tam analiz edir. O nə deyirsə, biz də meydanda onu yerinə yetirməliyik“.
Kamran “Maccabi”nin güclü rəqib olduğunu bildiyini söyləyib: “Rəqib güclü olsa da, ən güclü deyil. Biz də qələbə qazanmaq istəyirik və bizim buna layiq azarkeşlərimiz var. Təəssüf ki, onlar bura gələ bilmədilər. Amma milyonlarla insan ekran qarşısında bizim üçün dualar edəcək”.
